Жиззахда икки фуқарони 6,4 минг доллар эвазига Жанубий Корея юборишни ваъда қилган шахс қўлга олинди

Бош прокуратура ҳузуридаги департамент ходимлари томонидан жойларда пул эвазига хорижий давлатларга юборишни ваъда қилган шахслар қўлга олинди.

Хусусан, департамент ҳамда ДХХнинг Жиззах вилояти бошқармалари томонидан ўтказилган тезкор тадбирда, муқаддам фирибгарлик жинояти учун судланган М.Н. фуқаролар Г.А. ва К.Ў.нинг ишончига кириб, уларни гўёки Миграция хизматида ишловчи танишлари ёрдамида Жанубий Корея давлатига ишга юбориш эвазига 6 400 АҚШ долларини олган вақтида ашёвий далиллар билан ушланган.

Шу каби, департамент ҳамда ДХХнинг Мирзо Улуғбек тумани бўлимлари томонидан ўтказилган тезкор тадбирда, фуқаролар А.Ш. ва К.Н. фуқаро Э.Х.нинг ишончига кириб, уни гўёки Миграция хизматида ишловчи танишлари ёрдамида Англия давлатига ишга юбориши ва ҳужжатларини расмийлаштириб бериши эвазига 1 000 долларни олган вақтларида ашёвий далиллар билан қўлга олинган.

Департаментнинг Марғилон шаҳар бўлими томонидан ўтказилган терговга қадар текширувда фуқаро М.А. фуқаролар И.А. ва У.И.нинг ишончига кириб, уларни Япония ёки Жанубий Корея давлатларига ишга юбориш эвазига жами 4 850 долларни фирибгарлик йўли билан қўлга киритгани аниқланиб, ушбу пуллар ҳисобидан 400 долларини қайтаргани процессуал тартибда расмийлаштирилган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.