Япония космик қурилмаси Ой юзасини суратга олди (фото)

Япониянинг қўнувчи Hakuto-R қурилмаси Ерга Ой юзасининг янги суратини юборди. Бу ҳақда Space хабар берди. 

Hakuto-R қурилмаси 20 март куни Ой орбитасига етиб келган. У Ерга узатган расмда коинотнинг қоронғилиги фонида Ой юзасида ёрқин акс этган кратерларни кўриш мумкин. Тасвирда Ойнинг бир қисмида кратерлардан тушаётган соя ҳам акс этган. Hakuto-R бу тасвирни ўзига ўрнатилган махсус камера ёрдамида олган.

Hakuto-R SpaceX Falcon 9 ракетасида 2022 йил 11 декабрда Ойга учирилган. Космик кема, агар ҳаммаси режа бўйича амалга ошса, апрель ойи охирида Ой юзасига хавфсиз қўниши кутилмоқда.

“Агар бу муваффақиятли амалга ошса, Япония космик кемаси АҚШ, Совет Иттифоқи ва Хитойдан кейин Ойга юмшоқ қўнишга эга бўлган тўртинчи давлатга айланади”, — дейилади хабарда.

Шунингдек, бу шахсий бошқариладиган космик кеманинг Ойга тарихий биринчи қўниши бўлади. Hakuto-R қурилмаси ўзи билан бирга Бирлашган Араб Амирликлари космик агентлиги учун кичик Рашид қурилмасини ҳам олиб юради.