28 март куни Қирғизистон-Ўзбекистон давлат чегарасида қурол-яроғ ва ўқ-дорилар сақланган яширин жой топилди. Бу ҳақда Қирғизистон Миллий хавфсизлик давлат қўмитаси чегара хизмати хабар берди.
Маълум қилинишича, Жалолобод вилоятининг Сузоқ туманида чегара посбони билан вазифасини ўтаётган хизмат ити давлат чегарасидан 600 метр масофада сигнал берган.
“Чегарачилар бу жойда сув қудуғига яширинган арраланган 16 калибрли ов милтиғини топди”, — дейилади хабарда.
Қурол полиэтилен плёнка билан ўралган бўлган. Қурол ва ўқ-дорилар баённомага мувофиқ расмийлаштирилиб, Қирғизистон Ички ишлар вазирлиги ҳудудий бўлинмаси ходимларига топширилган.
Январь ойида Қирғизистон ва Ўзбекистон чегарасидаги “Дўстлик” назорат-ўтказиш пункти яқинида контрабандачилар фойдаланаётган омборхона топилганди. Омборда турли хил болалар кийимлари бўлиб, ҳар бири 25-30 килограммдан 27 ўрамдан иборат маҳсулот аниқланганди.
Ноябрь ойида Қирғизистонда халқаро наркогуруҳ аъзолари қўлга олинганди, улар орасида Ўзбекистон фуқароси ҳам аниқланган.
Изоҳ (0)