Жиззах вилояти ҳокимлиги 17—28 март кунлари 465 миллион сўмлик тендер ўтказган. “Дарё” мухбири лот маълумотларини кўздан кечириш жараёнида 8 март — Халқаро хотин-қизлар кунига аталган совғаларни топшириш муддати ўтиб кетганини аниқлади.
Ўтказилган тендер 28 март куни якунланган. Лекин лот маълумотларига кўра, совғалар 8 март — Халқаро хотин қизлар куни арафасида топширилиши кўзда тутилган. Ғолиб тадбиркор ҳокимликка 455 тадан аёллар сумкаси, 2 жуфт чинни сервиз, шоколад коллекцияси ва 55 дона персонли сервиз етказиб бериши керак.
Тендерда иккита тадбиркорлик субъекти иштирот этган бўлиб, “Мубина-Миниса Капитал” МЧЖ ғолиб деб топилган, Аzbоа-Uz МЧЖ эса захира ғолиб сифатида кўрсатилган.
“Совғани кеча топширдик”
“Дарё” ҳолат юзасидан изоҳ олиш мақсадида Жиззах вилояти ҳокимлиги ҳисобчиси Аброр Умаров билан боғланди. Унинг айтишича, лот “etender.uzex.uz” порталига кечроқ қўйилган.
Мухбирнинг “Совғалар эгаларига байрамдан 21 кун ўтиб берилганми?” деган саволига ҳисобчи “Ҳа”, деб жавоб берди.
“Биз маҳсулотларни етказиб берганмиз”
“Дарё” тендерни ютиб олган “Мубина—Миниса Капитал” МЧЖ раҳбари Майхоной Одилова билан боғланиб, ҳолат юзасидан изоҳ сўради. Унинг айтишича, совғалар олиб келиб топширилган.
“Биз рўйхатда кўрсатилган маҳсулотларни олдинроқ олиб бориб берганмиз”, — деди Майхоной Одилова.
Маълумот учун, Жиззах вилоятида 8 март — Халқаро хотин-қизлар куни муносабати билан ўтказилган байрам тадбири 3 март куни бўлиб ўтган.
Тегишли ташкилот ва идоралардан ҳолатга муносабат билдиришни кутиб қоламиз. “Дарё” воқеалар ривожини кузатишда давом этади.
Изоҳ (0)