Ким Чен Ин ядро қуроли учун материаллар ишлаб чиқаришни кўпайтиришни буюрди

Шимолий Корея етакчиси Ким Чен Ин мамлакатнинг ядровий салоҳиятини ошириш учун ядровий материаллар ишлаб чиқаришни кўпайтиришни буюрди, деб хабар бермоқда EA Daily Корея марказий ахборот агентлигига таяниб.

“Корея Меҳнат партияси Марказий Қўмитасининг ядро қуроли сонини кўпайтириш режасини тўлиқ амалга ошириш учун келажакда қурол-яроғга мўлжалланган ядровий материаллар ишлаб чиқаришни кенгайтириш ва кучли ядро қуролларини ишлаб чиқаришни давом эттиришга туртки бериш зарур”, — дейди Ким Чен Ин.

Шимолий Корея раҳбари, шунингдек, ядро салоҳиятини ривожлантириш мамлакат суверенитетини ҳимоя қилиш учун зарур эканини таъкидлади.

21—23 март кунлари ўтказилган машғулотлар доирасида Шимолий Корея “цунами чақиришга қодир” сувости дронини синовдан ўтказган эди. “Ушбу махфий қурол ядровий сувости кемаси ҳужумини амалга оширувчи дрондир. Унинг вазифаси — яширинча сузиб бориш, сув остида портлаб, душман кема гуруҳлари ва портини йўқ қилиш учун ўта кучли радиоактив сунами ҳосил қилиш”, — дейилади “Корея овози” давлат радиосида.

18 ва 19 март кунлари бўлиб ўтган машғулотларда эса Шимолий Корея ҳарбийлари ядровий зарба бериш қўмондонлиги тизимини бошқаришни, ядровий ҳужумга зудлик билан ўтиш​ усулларини машқ қилган. 

Ким Чен Ин машғулотлар якунида ҳарбийлар “исталган вақтда зудлик билан, кучли ва фаол ядровий жавобга” тайёр туриши кераклигини айтди.