Чорвоқ сув омбори қирғоқларидан одам суяклари топилди

Ижтимоий тармоқларда Чорвоқ сув омбори қирғоқларида одам суяклари аниқлангани айтилган видео тарқалди. Бўстонлиқ туман прокуратураси ҳолат бўйича “Дарё”га маълумот берди.

Идоранинг маълум қилишича, ушбу қирғоқда бундан бир неча йиллар аввал Бўстонлиқ туманидаги “Болодала” МФЙ ҳудудида жойлашган “Безгати боғ” қабристони бўлган. Ушбу қишлоқда яшовчи аҳоли шу қабристонга дафн этилган, сув омборида сув сатҳининг кўтарилиши натижасида қабристон сув остида қолиб кетган ва ҳозирда сув сатҳи пасайгани сабабли одам суяклари юзага чиққани аниқланган.

“Чорвоқ сув омборида ҳар йилнинг бошида сув сатҳи пасайиши натижасида бундай ҳолатлар кузатилиб турилиши маълум бўлди”, — дейилади прокуратура муносабатида.

Ҳозирда мазкур ҳолат юзасидан туман прокуратураси томонидан терговга қадар текширув ҳаракатлари олиб борилмоқда, натижаси бўйича қонуний қарор қабул қилиниши таъминланади.