Туркманистон ҳукумати зилзила ва бошқа офатлар юз берганда маҳаллий аҳолини эвакуация қилиш учун мамлакатнинг ҳар бир ҳудудида лагерлар ташкил этмоқчи. Бу ҳақда “Хроника Туркменистана” хабар берди.
Вақтинчалик турар жой зоналарининг яратилишига сўнгги пайтларда Марказий Осиё мамлакатларида, жумладан Туркманистонда кузатилган бир неча зилзилалар сабаб бўлган. Туркманистонлик сейсмологларнинг маълумотига кўра, яқинда мамлакатда содир бўлган ер силкинишлари кучи 4,8 баллга етган. Қурбонлар ва вайронагарчиликлар бўлмаганига қарамай, уч кун давомида Туркманистоннинг барча ҳуқуқ-тартибот идоралари кучайтирилган режимда ишлаган.
Таъкидланишича, 8-10 километр узоқликдаги ҳар бир вилоятда 20 гектар майдонда табиий ёки техноген оқибатлар содир бўлган тақдирда аҳолининг вақтинча яшаши учун ҳудудлар ташкил этиш бўйича ҳукумат қарори қабул қилинган. У ерда чодирлар ва сув резервуарлари ўрнатилади. Вилоятларда жойлашган ҳарбий қисмлар ушбу ҳудудларни чодирлар, кўрпа-тўшак ва матраслар билан таъминлаши керак.
Омборларда 15 кунга етарли озиқ-овқат маҳсулотлари сақланади. Бундан ташқари дори-дармон, бинт, гигиена воситалари ва зарур товарлар захираси яратилади. Ички ишлар органлари зилзила пайти талончиликни олдини олиш учун банклар, давлатга қарашли дўконлар, озиқ-овқат омборлари ҳамда завод ва фабрикалар омборларида сигнализация воситаларининг ишлашини текширади.
Изоҳ (0)