Ўзбекистонда ҳафта ўрталарида ёмғир ёғиши кутилмоқда

“Ўзгидромет” ҳафта давомида кузатиладиган об-ҳаво ҳақида маълумот берди.

Унга кўра, 27 март, душанба куни Ўзбекистон ҳудуди бўйича ҳаво асосан кам булутли бўлади, ёғингарчилик кутилмайди. Сешанба куни фақат Бухоро, Навоий вилоятларида баъзи жойларда бироз ёмғир ёғиши, момақалдироқ бўлиши мумкин.

Чоршанба куни ҳудуднинг катта қисмида баъзи жойларда ёмғир ёғади, момақалдироқ бўлиши мумкин. Қорақалпоғистон Республикаси, Хоразм вилоятида ва Фарғона водийси вилоятларида ёғингарчилик кутилмайди.

Пайшанба куни Тошкент, Самарқанд, Жиззах, Сирдарё вилоятларида ва Фарғона водийси вилоятларида ёмғир ёғиши кутилмоқда. Республиканинг қолган ҳудудларида ёғингарчилик кутилмайди. Жума куни эса Ўзбекистоннинг ҳеч қайси ҳудудида ёғингарчилик кутилмайди.

Ушбу ҳафтада ҳаво ҳарорати кечалари 9-14 даража, кундуз кунлари 27—28 мартда 22-27 даража, 29—31 мартда 20-25 даража атрофида бўлади.

27—28 мартда шимолда ва чўл ҳудудларда, 29 мартда республика бўйича баъзи жойларда шамол тезлиги 15-20 метр/секундгача кучайиши, айрим жойларда чанг-тўзон билан кузатилиши мумкин.

Республиканинг тоғолди ва тоғли ҳудудларида 28—31 март кунлари вақти-вақти билан ёмғир ёғади, момақалдироқ бўлиши мумкин.

Тошкентда  ҳаво бироз булутли бўлади, вақти-вақти билан ўзгариб туради, 27—28 мартда ёғингарчилик кутилмайди, 29—30 мартда вақти-вақти билан ёмғир ёғади, момақалдироқ бўлиши мумкин. Шамол асосан кучсиз эсади, фақат 29 мартда 12-15 метр/секундгача кучайиши мумкин. Ҳаво ҳарорати 27—28 мартда кечаси 9-11 даража, кундузи 24-26 даража, 29—30 мартда кечаси 11-13 даража, кундузи 20-22 даража бўлади.