Навоийда ўсиш, Тошкентда қисқариш: ҳудудларда товарлар экспорти ҳажми қандай бўлмоқда?

Ўзбекистоннинг январь—февраль ойларидаги товарлар экспорти ҳажми ўрганилди. Бу ҳақда “Дарё”га Иқтисодий тадқиқотлар ва ислоҳотлар маркази хабар берди.

Давлат божхона қўмитаси маълумотларига кўра, жорий йил бошидан 28 февралга қадар товарлар экспорти ҳажми ўтган йилнинг шу даврига нисбатан 3,1 фоизга ошган. 

Экспортнинг ўсиши Навоий (129 фоиз), Андижон (46,9 фоиз), Сирдарё (43,9 фоиз), Хоразм (38 фоиз) ва Қашқадарё (10,4 фоиз) вилоятларида ва Тошкент шаҳрида (3,5 фоиз) кузатилди.

Ўзбекистон экспортининг ўсиши озиқ-овқат маҳсулотлари, саноат товарлари, кимёвий моддалар ва қишлоқ хўжалиги маҳсулотлари экспортининг ўсиш суръатлари билан изоҳланади.

Экспортнинг қисқариши Фарғона (24,2 фоиз), Бухоро (20,3 фоиз), Тошкент (16,2 фоиз), Жиззах (12,9 фоиз), Самарқанд (7,9 фоиз), Сурхондарё (7,4 фоиз) ва Наманган (4,4 фоиз) вилоятлари ҳамда Қорақалпоғистон Республикасида (14,9 фоиз) қайд этилди.

Экспорт ҳажмининг камайиши Бухоро вилоятида – пахта толасининг ички бозорга йўналтирилиши ва нефть ва нефть маҳсулотлари экспортининг қисқариши, Фарғона, Жиззах ва Наманган вилоятларида – ип-калава экспортининг қисқариши, Тошкент вилоятида – металл ва ундан тайёрланган маҳсулотлар экспортининг қисқариши, Самарқанд вилоятида – мева-сабзавот маҳсулотлари ва ип-калава экспортини қисқариши, Сурхондарё вилоятида – ип-калава ва озиқ-овқат маҳсулотлари экспортини қисқариши, Қорақалпоғистон Республикасида эса — пластмасса ва ундан тайёрланган маҳсулотлар ҳамда ип-калава экспорти қисқариши билан боғлиқ.

Аввалроқ Ўзбекистон ташқи савдоси икки ойда 8,9 млрд долларга етгани ҳақида хабар берилганди.