Зеленский қурол-яроғ етишмаслиги сабаб қарши ҳужум бошлашнинг иложи йўқлигини тан олди

Украина ўқ-дори ва қурол-яроғ етишмаслиги сабабли ҳозирча қарши ҳужумга ўта олмайди, деди мамлакат президенти Владимир Зеленский Yomiuri Shimbun газетасига берган интервьюсида.

У мамлакат шарқидаги вазиятни оғир деб баҳолади. “Биз ҳамкорларимиздан ўқ-дорилар келишини кутмоқдамиз”, — деди Зеленский. “(Қарши ҳужумни) ҳали бошлай олмаймиз”, — деб қўшимча қилди у. Украина раҳбарининг қайд этишича, Киев узоқ кута олмайди.

Украина президенти Хитойнинг урушни тугатиш бўйича таклифларига ҳам шубҳа билан қаради. Унинг айтишича, Киев Пекиндан музокаралар ўтказиш бўйича ҳеч қандай сўров олмаган. У Киев дипломатик каналлар орқали Пекинга ўз тинчлик формуласини етказгани ва жавоб кутаётганини эслатди.

Шу ҳафта Украина етакчиси Украина ва Ғарбнинг “қўшма ҳаракатлардаги кечикишлар сабаб янги муваффақиятлар камроқ” бўлаётганига эътибор қаратди. “Бу бизни тинчликка эришишдан узоқлаштиради”, — деди Зеленский. Унинг тушунтиришича, айниқса, Ғарб давлатлари узоқ масофага учувчи ракеталар ва замонавий қирувчи самолётлар етказиб беришни кечиктирмоқда ва тинчлик формуласини муҳокама қилиш учун Украина таклиф қилган саммитни тегишли даражада қўллаб-қувватламаяпти.

Зеленский 23 март куни Европа кенгаши йиғилиши иштирокчиларига мурожаатида Россия—Украина урушининг тугашини тезлаштиришга нима тўсқинлик қилаётганини тушунтириб берганди.

Зеленский бунга сабаб сифатида Ғарб қирувчиларининг кечикиши ҳамда Россияга қарши янги ва кучлироқ санкциялар заруратини санади.