Янгийўлда эркак ижара пулини сўраб келган икки кишини ўлдириб, ёқиб юборди
Тошкент вилояти Янгийўл туманида 23 март куни 38 ёшли эркак икки кишини ўлдириб, ёқиб юборди. Бу ҳақда “Дарё”га Бош прокуратура матбуот котиби Ҳаёт Шамсутдинов хабар берди.
Маълум бўлишича, шу куни соат 14:30 да “Нурли диёр” масъулияти чекланган жамиятида агроном бўлиб ишлаган 1961 йилда туғилган К.А. ва жамият мутахассиси 1984 йилда туғилган С.Г. фуқаро Б.Ж.нинг ёнига бориб, ижарага олинган майдон учун 40 миллион сўм миқдорида ҳақ талаб қилган.
Шу вақтда воқеа иштирокчилари ўртасида жанжал келиб чиққан. Фуқаро Б.Ж. пул бермаслик мақсадида уларни дала шийпонига олиб бориб, ошхона пичоғи билан қасддан ўлдирган. Шундан сўнг у жиноий ҳаракатларини яшириш учун мурдаларни ёқиб, тана қолдиқларини ариқ бўйига ташлаб юборган.
Мазкур ҳолат юзасидан Жиноят кодексининг 97-моддаси (қасддан одам ўлдириш) 2-қисми “а, ж, и” бандлари билан жиноят ишлари қўзғатилган. Гумонланувчи шахс просессуал тартибда ушланган.
