Қорақалпоғистон Республикаси ва Навоий вилоятида пул эвазига ҳайдовчилик гувоҳномаси олиш учун бўлиб ўтадиган имтиҳондан ўтказиб қўйишни ваъда қилган шахслар ушланди, деб хабар беради Бош прокуратура ҳузуридаги департамент.
Қайд этилишича, департаментнинг Қўнғирот туман бўлими томонидан ДХХ ва ИИВ ходимлари билан ҳамкорликда тезкор тадбир ўтказилган. Тадбир давомида “Ҳ.А.” нодавлат таълим муассасасининг ўқитувчиси У.И. фуқаро У.Г.нинг ишончига кириб, уни танишлари ёрдамида ҳайдовчилик гувоҳномаси олиш учун бўлиб ўтадиган имтиҳондан ўтказиб қуйиш эвазига 7,5 миллион сўмни олган вақтида ашёвий далиллар билан ушланган.
Шу каби департаментнинг Нурота туман бўлими томонидан ўтказилган тезкор тадбирда, муқаддам фирибгарлик жинояти учун судланган М.А. икки нафар фуқаронинг ишончига кириб, уларни ҳайдовчилик гувоҳномаси олиш учун бўлиб ўтадиган имтиҳондан ўтказиб қўйиш эвазига 4 миллион сўм пулларни турмуш ўртоғи орқали олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари олиб борилмоқда.
Изоҳ (0)