Қодиров яна “Чеченистонда хизмат кўрсатган ҳуқуқ ҳимоячиси” медали билан тақдирланди
Чеченистоннинг Инсон ҳуқуқлари бўйича комиссари Нурди Нухажиев республика раҳбари Рамзан Қодировни “Чеченистон республикасида хизмат кўрсатган инсон ҳуқуқлари ҳимоячиси” медали билан тақдирлади, деб хабар бермоқда Meduza.
“Фуқароларнинг конституциявий ҳуқуқ ва эркинликларини ҳимоя қилишдаги улкан хизматлари, чечен халқининг миллий манфаатларини таъминлаш, анъанавий қадриятларга ва бурчга содиқлик масалаларида жасорат ва ҳалоллик учун тақдирланди”, — дейилади ҳужжатда.
“ТАСС” хабарига кўра, худди шундай медаллар билан республика раҳбарининг ота-онаси – Минтақавий жамоат фонди президенти Аймани Қодирова ва Чеченистоннинг биринчи президенти Ахмат-Хожи Қодиров (вафотидан кейин) ҳам тақдирланган.
Қодиров 2007 йилдан бери Чеченистонни бошқариб келади. У бир неча бор республикада ва хорижда инсон ҳуқуқларини бузганликда айбланган.
2021 йил охирида ҳам Чеченистон раҳбари ва унинг ота-онаси республикада хизмат кўрсатган ҳуқуқ ҳимоячилари деб эълон қилинган эди. Ўшанда Омбудсман Қодировларнинг “инсон ҳуқуқларини таъминлаш, давлатчиликни мустаҳкамлаш, фуқароларнинг ижтимоий-иқтисодий ҳуқуқларини рўёбга чиқариш, ҳар бир инсон ва жамият фаровонлигини ошириш учун шарт-шароит яратиш, кенг кўламли гуманитар ёрдам кўрсатиш ва хайрияга қўшган улкан ҳиссаси”ни қайд этган.
2023 йил февралда Рамзан Қодиров Чеченистон республикаси Қаҳрамони унвонини олди, бу унвонни унинг ўзи 2022 йил кузида таъсис этган. Қодиров янги унвонга сазовор бўлган биринчи шахсга айланди.
Умуман олганда, Қодиров бир неча ўнлаб давлат ва ҳудудий мукофотлар соҳиби, жумладан, республика раҳбарига “Чеченистонда хизмат кўрсатган жисмоний тарбия ходими” ва “Чеченистонда хизмат кўрсатган қурувчи” фахрий унвонлари ҳам берилган.
