НАТО Россиянинг Калининград вилояти билан чегарада ҳарбий машғулотлар ўтказади

Польша НАТОдаги иттифоқчилари билан биргаликда Россиянинг Калининград вилояти чегарадоши Вистула Спит дарёси бўйида ҳарбий машғулотлар ўтказади. Бу ҳақда PAP агентлиги хабар бермоқда.

Машғулотлар 27 мартдан 31 мартгача бўлиб ўтади. Уларда қуруқликдаги қўшинлар, муҳандислик қўшинлари, шунингдек, денгиз флоти иштирок этади. Машғулотларда НАТОга аъзо бошқа давлатлардан биттадан батальон-тактик гуруҳ қатнашади.

Машқлар жами 2 500 нафар ҳарбий хизматчи иштирокида ўтказилади. Шунингдек, 500 та техника ва қуроллар жалб қилинади.

Ҳарбий машғулотлар нафақат Вистула Спит бўйида, балки Польшанинг Малборк шаҳридаги авиабазада, Моржевин ҳудудида ва Гдуния портида ҳам ўтказилади. Қўшинлар муҳандислик қўшинлари ёрдамида дарёни кесиб ўтишни машқ қилади.

Февраль ойида НАТО қўшинлари Адриатик денгизида қўшма машғулотлар ўтказган эди. Уларда АҚШ ҳарбий-денгиз кучларининг USS George Bush авиаташувчи кемаси, Италиянинг ITС Cavоur авиаташувчи кемаси, Испаниянинг Juan Cаrlоs I десант универсал кемаси, Американинг USS Delbert D. Black эсминеци, USS Leyte Gulf ракета крейсери ва Италиянинг ITС Cаiо Duilio эсминеци иштирок этган.