Андижон, Жиззах ҳамда Фарғона вилоятларида электр тармоқларига ноқонуний уланиш ҳолатлари фош этилди, деб хабар беради Бош прокуратура ҳузуридаги департамент.
Қайд этилишича, департаментнинг Андижон шаҳар бўлими томонидан ЭТК ходимлари билан ҳамкорликда терговга қадар текширув ўтказилган. Унда якка тартибдаги тадбиркор А.С. ва бошқалар “С.С.” номли кафени ҳеч қандай ҳужжатсиз умумий фойдаланишдаги электр тармоғига ўзбошимчалик билан улаб, 1,5 миллион кВт/с электр энергиясидан ноқонуний фойдаланиб келгани аниқланган.
Шунингдек, Мирзачўл туманидаги “I.П.” МЧЖ вилоят филиали раҳбари Д.Н. ва бошқалар компьютер саводхонлиги бўйича ўқув марказ биносини ҳеч қандай ҳужжатсиз умумий фойдаланишдаги электр тармоғига ўзбошимчалик билан улаб, 233,5 минг кВт/с электр энергиясидан ноқонуний фойдалангани маълум бўлди.
Худди шудай, департаментнинг Асака туман бўлими томонидан ЭТК ходимлари билан ҳамкорликда ўтказилган терговга қадар текширувда, “Г.М.А.” МЧЖ масъул шахслари ва бошқалар қозон ишлаб чиқариш цехини “ПК электро ҳисоб” дастурида мавжуд бўлмаган электр ҳисоблаш ускунасига улаб, 163,2 минг кВт/с электр энергиясидан ноқонуний фойдалангани аниқланган.
Департаментнинг Бағдод тумани бўлими томонидан эса “С.Ш.” фермер хўжалиги иш юритувчиси Ғ.А. ва бошқалар ушбу фермер хўжалигига қарашли ер майдонини суғориш учун сув насосини умумий фойдаланишдаги электр тармоғига ўзбошимчалик билан улаб, 116,5 минг кВт/с электр энергиясидан ноқонуний фойдаланганликлари аниқланган.
Ушбу қонунбузилиш ҳолатлари оқибатида давлат ва жамият манфаатларига жами 913,5 миллион сўм зарар етказилган.
Мазкур ҳолатлар юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилиб, тергов харакатлари ўтказилмоқда.
Изоҳ (0)