Андижон шаҳрида талаба қизнинг шахсий суратларини ижтимоий тармоқларда тарқатмаслик эвазига пул талаб қилган шахс қўлга олинди, деб хабар беради ИИВ Киберхавфсизлик маркази.
Қайд этилишича, Андижон вилоятидаги олий таълим муассасаларидан бирида 1-курсда ўқийдиган 20 ёшли талаба қиз ИИБга мурожаат қилиб, Telegram мессенжерида “Панда” номли профил фойдаланувчиси билан танишганини билдирган. Қиз ушбу фойдаланувчи билан яқин муносабатда гаплашган, сўнг у қизга тегишли, сир сақланиши лозим бўлган фотосуратларини қўлга киритиб, ушбу маълумотларни ижтимоий тармоқлар орқали тарқатиш ва яқинларига юбориш билан қўрқитган. Мазкур профил фойдаланувчиси бундай қилмаслик эвазига 1 миллион 150 минг сўм пул талаб қилган.
Ўтказилган тезкор-қидирув тадбирлари натижасида “Панда” профили фойдаланувчиси Андижон шаҳрида яшовчи 28 ёшли М.А., экани аниқланиб, у П.М.ни қўрқитиб, ундан кимёвий ишлов берилган пулларни олаётган вақтида ашёвий далиллар билан ушланган.
М.А.га нисбатан Жиноят кодексининг 165-моддаси (Товламачилик) 1-қисми билан жиноят иши қўзғатилиб, тергов ҳаракатлари олиб борилмоқда.
Қонунга мувофиқ, М.А. томонидан содир этилган жиноий ҳаракатлар учун 3 йилдан 5 йилгача озодликдан маҳрум қилиш жазоси назарда тутилган.
Изоҳ (0)