Украина президенти Владимир Зеленский ва Хитой раҳбари Си Цзиньпин ўртасидаги суҳбат бекор қилинмади, бироқ уни ташкиллаштиришга Хитойнинг уруш бўйича позицияси тўсқинлик қилмоқда. Бу ҳақда Украина президент офиси раҳбарининг маслаҳатчиси Михаил Подоляк маълум қилди.
“Бу жуда қийин. Хитой ҳали ўзининг янги сиёсий ўрнини топа олмагани масаласи бор. Яъни, у Россия ва Украина ўртасидаги келишув масаласини ўз зиммасига олмоқчими ёки эҳтиёткорлик билан четга чиқадими? Тушунишимча, Хитой ҳали буни ўзи учун ҳал қилмаган”, — деди Подоляк.
Маслаҳатчининг айтишича, Зеленский бугунги кунда Украинадаги жанговар ҳаракатларнинг “нотўғри якунланиши оқибатларини, ҳатто бетараф позициядаги давлатлар учун ҳам тушунтира оладиган” ягона шахс.
Wаll Street Journal март ойи бошида Хитой раҳбари Россияга ташрифидан кейин Зеленский билан гаплашишни режалаштираётгани ҳақида ёзган эди. Си 22 март куни Москвага уч кунлик ташрифини якунлади, бироқ Киев суҳбат ўтказилиши ҳақида Пекиндан ҳалигача тасдиқ олмади. “Уларнинг бир-бирига айтадиган гаплари бор”, — деб таъкидлади Украина бош вазир ўринбосари Ирина Верешук.
АҚШ расмийлари Украина ва Хитой раҳбарларининг эҳтимолий алоқаларини қўллаб-қувватлаб, “Хитой ва Си Цзиньпиннинг ўзи фақат Россия нуқтаи назарини эмас, балки бевосита Украина нуқтаи назарини эшитиши керак”, — деб таъкидлади. “Биз Си Сзинпиннинг Зеленский билан тўғридан тўғри алоқага чиқишига умид қиламиз”, — деди Америка президентининг миллий хавфсизлик бўйича маслаҳатчиси Жейк Салливан.
Изоҳ (0)