Сурхондарёда мактаб ўқитувчилари “Open budget”да овоз тўплашга мажбурланаётгани айтилди 

Сурхондарё вилояти Ангор туманида мактаб ўқитувчилари “Open budget”да овоз тўплашга мажбурланаётгани айтилди. Вилоят прокуратураси ахборот хизмати мазкур хабар юзасидан маълумот берди. 

Унга кўра, ижтимоий тармоқларда Ангор тумани, “Новшаҳар” маҳалласида, 36-сонли мактаб ўқитувчилари “Open budget” лойиҳаси учун овоз тўплашга мажбурланаётгани тўғрисида тарқалган хабарлар вилоят прокуратураси томонидан назоратга олиниб, ҳозирда кўриб чиқилмоқда. Шунингдек, прокурор ўқитувчиларга овоз йиғишга топшириқ бергани ёлғон экани таъкидланган.

“Хабарда прокурор ўқитувчиларни овоз йиғишга топшириқ бергани савол остига олинган бўлиб, ижтимоий тармоқ фаолларидан бу каби ёлғон ахборот тарқатмаслик ва туҳматдан сақланиш сўралади”, — дейилади хабарда.

Аввалроқ Мактабгача ва мактаб таълими вазирлиги ўқитувчиларга ушбу лойиҳада овоз йиғиш учун мажбурий топшириқ берилаётгани, топшириқни бажаришга эътиборсиз қараётган ўқитувчиларга керакли чора кўриш билан таҳдид қилинаётгани тўғрисида хабарлар вазирлик томонидан жиддий ўрганилаётганини маълум қилганди.