Шимолий Корея “радиоактив цунами” чақиришга қодир сувости дронини синовдан ўтказгани ҳақида эълон қилди
Шимолий Корея “радиоактив цунами” келтириб чиқаришга қодир бўлган сувости дронини синовдан ўтказди, деб хабар бермоқда “Корея Овози” давлат радиоси.
“Ушбу махфий қурол ядровий сувости кемаси ҳужумини амалга оширувчи дрондир. Унинг вазифаси — яширинча сузиб бориш, сув остида портлаб, душман кема гуруҳлари ва портини йўқ қилиш учун ўта кучли радиоактив цунами ҳосил қилиш”, — дейилади хабарда.
Маълумотларга кўра, дрон 21 март куни синовдан ўтказилган ва у 80—150 метр чуқурликда тахминан 59 соат ҳаракатланган. Белгиланган нуқтага етиб боргач, шартли душман порти яқинида дрон тажрибали жанговар каллакни портлатган.
“Корея Овози” шунингдек, 22 март куни Шимолий Корея ҳарбийлари машғулотлар доирасида иккита “Хvasar-1” серияли стратегик қанотли ракета ва иккита “Хvasar-2” серияли ракетасини учиргани ҳақида хабар берди.
Маҳаллий матбуотнинг ёзишича, синовлар АҚШ ва Жанубий Корея ҳарбий машғулотларига жавобан ўтказилган.
Март ойи ўрталарида АҚШ ва Жанубий Корея “Озодлик қалқони” деб номланган қўшма машғулотлар ўтказган эди. Вашингтон ва Сеул Шимолий Кореянинг баллистик ракета синовлари фонида КХДРдан эҳтимолий тажовузни қайтариш сценарийларини ишлаб чиқди — 2022 йилда Шимолий Корея 37 марта ракета синовини амалга оширди, уларда 70 га яқин ракета учирилди.
