Саида Мирзиёева БМТда Орол денгизи фожиасининг оқибатлари ҳақида нутқ сўзлади
Саида Мирзиёева 23 март куни БМТнинг Нью-Йоркдаги бош қароргоҳида ўтказилган Сув масалалари бўйича конференцияда нутқ сўзлади, деб хабар беради ЎзА.
Қайд этилишича, Мирзиёева БМТ минбаридан Орол денгизи фожиасининг оқибатлари, уларни юмшатиш бўйича Ўзбекистон томонидан амалга оширилаётган кенг кўламли ишлар ва бу борадаги халқаро саъй-ҳаракатларни бирлаштиришда мамлакатнинг етакчилиги хусусида сўз юритган.
Саида Мирзиёева Оролбўйидаги Мўйноқ илгари йирик ишлаб чиқариш қувватларига эга порт шаҳар бўлгани, кейинчалик мувозанат бузилиб, денгизнинг ўлик қирғоқлари кемалар қабристонига айланганини таъкидлаб, қорақалпоқ элининг атоқли шоири Иброҳим Юсупов ижодидан денгизнинг кўз очиб юмгунча саҳрога айланиши тасвирланган сатрларни ўқиб берган.
“Орол денгизининг инқирози инсониятнинг атроф-муҳитга эътиборсизлиги оқибатлари ҳақида даҳшатли эслатмадир. Бироқ ғамхўр одамларнинг саъй-ҳаракатлари туфайли у яна умид ва янгиланиш рамзига айланмоқда”, — деди Саида Мирзиёева.
Сўзининг якунида Саида Мирзиёева халқаро ҳамжамиятни глобал сув масалалари билан чамбарчас боғлиқ бўлган Орол фожиаси оқибатларини юмшатишда Ўзбекистоннинг саъй-ҳаракатларини қўллаб-қувватлашни давом эттиришга чақирган.
Аввалроқ Германия Оролбўйи минтақаси учун 700 минг доллар ажратиши тўғрисида хабар берилганди.
