Расман: Томас Тухель — “Бавария” бош мураббийи
Мюнхеннинг “Бавария” клуби 35 ёшли мураббий Юлиан Нагелсманнинг истеъфога чиққанини маълум қилди.
Ушбу қарор клуб раҳбарияти томонидан қабул қилинди ва президент Герберт Ҳайнер томонидан тасдиқланди.
Нагелсманн 2021 йил ёзидан буён “Бавария”ни бошқариб келаётган эди ва унинг қўл остида жамоа мамлакат чемпионлиги қўлга киритган ва икки марта Германия Суперкубогида ғалаба қозонган.
“Бавария”да Юлианнинг ўрнини Томас Тухель эгаллади. 49 ёшли мураббий мюнхенликлар билан 2025 йил 30 июнга қадар мўлжалланган шартнома имзолади.
Тухель “Бавария” сафидаги илк учрашувини 1 апрель куни “Боруссия Д”га қарши ўтказади.
Томас фаолияти давомида 10 та совринни қўлга киритган, жумладан, Чемпионлар Лигаси, УЕФА Суперкубоги, клублар ўртасидаги Жаҳон чемпионати ва Франция чемпионлигида зафар қучган.
