Ўзбекистонда аҳоли пунктидан ташқаридаги йўлларда қоидабузарликни аниқлашда дронлардан фойдаланиш йўлга қўйилади. Бу ҳақда Вазирлар Маҳкамасининг “Давлат йўл ҳаракати хавфсизлиги хизматида ягона автоматлаштирилган ахборот тизимини яратиш чора-тадбирлари тўғрисида”ги қарори лойиҳасида қайд этилган.
Жамоатчилик муҳокамаси учун эълон қилинган ҳужжат лойиҳасига кўра, ИИВ, Рақамли технологиялар вазирлиги, Мудофаа вазирлиги ҳузуридаги Мудофаа саноати агентлиги ҳамда бошқа манфаатдор ташкилотлар билан биргаликда 2023 йил 1 октябргача аҳоли яшаш пунктларидан ташқаридаги йўлларда қоидабузарлик ёки ҳодисаларни, қидирувдаги транспорт воситасини аниқлаш, зарур чораларни кўриш ҳамда ёрдам кўрсатишда тезкорликка эришиш мақсадида учувчисиз учадиган аппаратлардан фойдаланиш ҳамда уларни сақлаш бўйича илғор хориж тажрибасини ўрганиб чиқиб, белгиланган тартибда Вазирлар Маҳкамасига таклиф киритади.
Замонавий рақамли технологиялар ҳисобига тарқоқ тизимларни бирлаштириш орқали йўл ҳаракати хавфсизлигини бошқаришнинг самарадорлигини ошириш, аҳолига муносиб хизмат кўрсатиш мақсадида, ИИВ Жамоат хавфсизлиги департаменти Йўл ҳаракати хавфсизлиги хизматида ягона автоматлаштирилган ахборот-таҳлил тизими яратилади.
Ягона ахборот тизим ЙҲХХнинг барча амалдаги ахборот тизимларини ягона платформага ўзаро интеграция қиладиган платформа ҳисобланади ва республика ижро этувчи ҳокимият ҳамда прокуратура ва суд органларининг фаолиятига жорий этилган ахборот тизимларига интеграция қилинади.
Маълумотларни мақсадли алмашиш учун ушбу тизим хўжалик юритувчи субъектларнинг фаолиятига жорий этилган ахборот тизимларига амалдаги қонунчиликка мувофиқ шартнома асосида интеграция қилинади.
Йўл ҳаракати қоидаларининг бузилишига доир маъмурий ишлар Ягона ахборот тизимининг “Маъмурий амалиёт” модули орқали ўзаро интеграция қилинган Маъмурий ҳуқуқбузарликлар тўғрисида ягона электрон иш юритув тизими (“E-ma’muriy ish” ахборот тизими) тартиб-таомилига мувофиқ юритилади.
Ягона ахборот тизимидаги ҳуқуқбузарлик тўғрисидаги баённома ҳамда маъмурий жазо қўллаш тўғрисидаги қарорлар “E-ma’muriy ish” ахборот тизими орқали шакллантирилувчи ягона хос (уникал) рақам орқали рўйхатга олинади.
Йўл ҳаракати қоидаларининг бузилишига доир маъмурий ишларни кўриб чиқишни шу жумладан фото-видео фиксация қилишнинг автоматлаштирилган тизими доирасида шакллантирилаётган маълумотларни ўзида марказлашган ҳолда жамловчи Ягона ахборот тизимининг “Маъмурий амалиёт” модули ишлаб чиқилади.
Ягона ахборот тизимининг “Маъмурий амалиёт” модули Олий суд ҳамда Бош прокуратура ҳузуридаги МИБнинг тегишли ахборот тизимларига интеграция қилинган ҳолда фаолият юритади.
Ушбу ҳужжат лойиҳаси муҳокамаси 8 апрелга қадар давом этади
Изоҳ (0)