Ўзбекистон футбол ассоциацияси ҳакамлар қўмитасининг навбатдаги йиғилиши 23 март, пайшанба куни бўлиб ўтди.
Унда сўнгги турлар доирасида бўлиб ўтган учрашувлардаги ҳакамлар ҳаракатлари кўриб чиқилди.
13 март куни бўлиб ўтган Суперлиганинг 3-тури доирасида “Пахтакор”—“Навбаҳор” ўртасидаги баҳс ҳаками Вадим Агишев, ВАР ҳаками Фирдавс Норсафаров ва ассистент ҳакам Бахтиёрхўжа Шавкатов учрашув давомида йўл қўйган хатолари учун назоратчи томонидан бош ҳакам, ВАР ва ассистент ҳакамлар қониқарсиз баҳога лойиқ кўрилган.
Вадим Агишевга нисбатан Ҳакамлик интизом кодексининг 2.3 бўлими 4-бандига асосан Суперлигада 6 тур учрашувларидан четлаштириш интизом чораси қўлланилди; Фирдавс Норсафаровга нисбатан Ҳакамлик интизом кодексининг 2.3 бўлими 7-бандига асосан Суперлигада ВАР ҳаками сифатида 4 тур учрашувларидан четлаштириш интизом чораси қўлланилди (учрашув натижасига таъсир кўрсатмагани учун); Бахтиёрхўжа Шавкатовга нисбатан нисбатан Ҳакамлик интизом кодексининг 2.3 бўлими 7-бандига асосан Суперлигада ВАР ҳаками сифатида 4 тур учрашувларидан четлаштириш интизом чораси қўлланилди.
Учрашувдаги баҳсли вазиятлар Эксперт-ҳакамлар комиссияси томонидан кўриб чиқилди.
Унга кўра, учрашувнинг 19-дақиқасида мезбонлар жарима майдони ичида меҳмонларнинг 21-рақамли футболчиси тўп учун курашда майдонга йиқилади. Бироқ ушбу вазиятда ўйин қоидаси бузилмаган эди. Ҳакам ушбу вазиятда ўйинни давом эттириши керак эди.
Шунингдек, учрашувнинг 71-дақиқасида мезбонларнинг 88-рақамли футболчиси меҳмон жамоа мухлисларига қарата тош улоқтиради. Футболчининг ушбу ҳаракатлари қизил карточкага лойиқ эди. Ҳакам бу вазиятда “Пахтакор” футболчисини спортга хос бўлмаган ҳаракатлари учун майдондан четлаштириши керак эди.
Бундан ташқари, учрашувнинг 90+3-дақиқасида мезбонлар жарима майдончаси ичида “Пахтакор”нинг 88-рақамли ва “Навбаҳор”нинг 22-рақамли футболчилари тўп учун курашган вақтда тўп мезбонлар ҳимоячисининг қўлига тегади. Ушбу ҳолатда иккала футболчи ҳам тўп учун курашаётган бўлган ва бу каби ҳолатларда тўпнинг қўлга тегиши қоида бузилиши сифатида қайд этилмайди. Ҳакам ушбу вазиятда ўйинни давом эттириши керак эди.
Суперлиганинг 2-туридан ўрин олган “Сурхон” ва “Андижон” ўртасидаги баҳсни олиб борган ҳакам Маҳмуд Турдиевга нисбатан огоҳлантириш интизом чораси қўлланилган, ВАР ҳаками Азиз Асимовга бош ҳакам сифатида 4 та, ВАР ҳаками сифатида 8 тур учрашувларидан четлаштириш интизом чораси қўлланилди, шунингдек, ассистент ҳакам Алишер Усмоновга Суперлигада ёрдамчи ҳакам сифатида 4 та, ассистент ҳакам сифатида 8 тур учрашувларидан четлаштириш интизом чораси қўлланилди.
У-21 чемпионатининг 1-тури доирасида “Турон” ва “Бухоро” баҳсини олиб борган бош ҳакам Акмал Раҳимов, иккинчи ёрдамчи ҳакам Азизбек Исаков ва захира ҳаками Шаҳбоз Ваҳобжонов учрашув давомида йўл қўйган хатолари учун назоратчи томонидан бош ҳакам ва иккинчи ёрдамчи ҳакам қониқарли, захира ҳаками эса қониқарсиз баҳога лойиқ кўрилган. Акмал Раҳимов ва Азизбек Исаковга нисбатан огоҳлантириш интизом чораси, Шаҳбоз Ваҳобжоновга эса 3 тур учрашувларидан четлаштириш интизом чораси қўлланилди.
Изоҳ (0)