Февралда олтин сотилмади: Ўзбекистон ташқи савдоси икки ойда 8,9 млрд долларга етди

2023 йил январь—февраль ойида Ўзбекистоннинг ташқи савдо айланмаси 8,9 млрд долларга етди. Бу ҳақда Статистика агентлиги хабар бермоқда. 

Мазкур кўрсаткич 2022 йилнинг мос даврига нисбатан 176,4 млн долларга ёки 2 фоизга кўпайди.

Ташқи савдода экспорт ҳажми 3,2 млрд долларга (2022 йилнинг январь—февраль ойларига нисбатан 23,7 фоизга кўпайди) ва импорт ҳажми 5,8 млрд долларга (25,1 фоизга кўпайди) етди. 

Йил бошидан бери 2,6 млрд долларлик манфий ташқи савдо баланси қайд этилди. 

Ўзбекистон дунё бўйлаб 155 мамлакат билан савдо алоқаларини амалга ошириб келмоқда. Ташқи савдонинг нисбатан салмоқли ҳиссаси Россия (16,2 фоиз), Хитой (14,9 фоиз), Қозоғистон (7,8 фоиз), Германия (6,4 фоиз), Туркия (6,1 фоиз), Корея (3,4 фоиз) ва Қирғиз Республикасига (1,9 фоиз) тўғри келмоқда. 

2022 йилнинг мос даврига нисбатан Ўзбекистон ташқи савдосида МДҲ давлатларининг улуши кўпайган. 

Ўзбекистон январда 1,2 млрд долларлик олтин сотган эди. Февраль ойида эса мамлакат нархлар пастлиги сабаб олтин сотмади. 

Экспорт таркибида товарлар улуши 82,2 фоизни ташкил этиб, улар саноат товарлари (19,4 фоиз), озиқ-овқат маҳсулотлари ва тирик ҳайвонлар (7 фоиз) ва турли хил тайёр буюмлар (6 фоиз) ҳиссасига тўғри келмоқда. 

Импорт таркибида эса энг катта улуш, машиналар ва транспорт асбоб-ускуналари (41,3 фоиз), саноат товарлари (14,8 фоиз) ҳамда кимёвий воситалар ва шунга ўхшаш маҳсулотлар (13,8 фоиз) ҳисобига тўғри келди.

Германиянинг январда асосий импорт ҳамкорига айлангани эса вақтинчалик ҳолат бўлиб чиқди.