АҚШ Суриядаги Эрон объектларига авиазарба берди
АҚШ армияси Сурияда Эроннинг Ислом инқилоби корпусига алоқадор кучларга қарши юқори аниқликда авиазарбалар йўллади. Тегишли буйруқ АҚШ мудофаа вазири Ллойд Остин томонидан президент Жо Байденнинг топшириғига биноан берилган, дейилади Пентагон сайтидаги хабарда.
Пентагоннинг тушунтиришича, авиазарбалар 23 март куни эрталаб Сурия шимоли-шарқидаги АҚШ базасига қилинган дрон ҳужумига жавоб бўлди. Ҳужумда бир нафар америкалик аскар ҳалок бўлган, беш нафари яраланган. АҚШ разведкаси дрон Эронда ишлаб чиқарилган деган хулосага келган.
“Президент Байден аниқ қилиб таъкидлаганидек, биз халқимизни ҳимоя қилиш учун барча зарурий чораларни кўрамиз ва ҳар доим, исталган вақтда, хоҳлаган жойда жавоб қайтарамиз. Ҳеч бир гуруҳнинг қўшинларимизга зарбаси жазосиз қолмайди”, — деди Остин.
Сурия президенти Башар ал-Асад АҚШ ҳарбийлари мамлакатни тарк этиши кераклигини айтди. “Бу бизнинг еримиз, уни озод қилиш бизнинг ҳуқуқ ва бурчимиздир. Америкаликлар эса кетиши керак, эртами-кечми шундай бўлади”, — деди у. Худди шундай талабни Эрон президенти Иброҳим Раисий ҳам билдирган.
Бунга жавобан Пентагон АҚШ ҳарбийларига ҳар қандай ҳужум “ёмон қарор” бўлишидан огоҳлантирди ва буни барча манфаатдор томонлар тушуниши кераклигини таъкидлади.
Маълумот учун, АҚШ ҳарбий контингенти Сурияда террорчи гуруҳлар, хусусан ИШИД жангариларига қарши курашда ҳомийлик қилиб, бу борада курдларнинг “Ўзини ўзи мудофаа қилиш ортряди”ни қўллаб-қувватлайди. АҚШ расмийлари террорчи ташкилот аъзолари йўқ қилингани ҳақида бир неча бор хабар берган.
