9 баллгача зилзила кузатилиши мумкин бўлган ҳудудлар рўйхати вазирлик томонидан эълон қилинмаган — ФВВ 

Ижтимоий тармоқларда ФВВ Ўзбекистон ҳудудларида 6 баллдан 9 баллгача зилзила кузатилиши мумкин бўлган 359 шаҳар рўйхатини эълон қилгани билан боғлиқ хабарлар тарқалмоқда. Вазирлик мазкур хабарлар ёлғон эканини маълум қилди. 

Унга кўра, мамлакатда яна бир бор зилзила рўй бериши мумкинлиги ҳақида ёлғон маълумотлар тарқалиб, унинг манбаси сифатида Фавқулодда вазиятлар вазирлиги расмий веб-сайти кўрсатилган. 7-9 балли зилзила рўй бериши мумкин бўлган ҳудудлар рўйхати ФВВ томонидан эълон қилинмаган. 

“Аҳолимизни саросимага тушмасликка ва фейк хабарларга ишонмасликка чақириб қоламиз. Бугунги кунда зилзиланинг вақти ва жойини аниқ белгилаб берувчи технология йўқлигини эслатиб ўтамиз”, дейилади вазирлик хабарида.

Куни кеча Ўзбекистонда яқин кунларда яна зилзила содир бўлиши ҳақида турли хабарлар тарқалганди. Фавқулодда вазиятлар вазирлиги ҳолатга муносабат билдириб, бугунги кунда дунёнинг ҳеч бир давлатида зилзила содир бўладиган сана ва ҳатто тахминий вақтни башорат қила оладиган технологиялар мавжуд эмаслигини, Ўзбекистон сейсмик фаол зонада жойлашгани сабабли баъзида ер силкинишлари содир бўлиши ва ҳар доим шундай бўлганини билдирганди.