УЕФА “Негрейра иши” бўйича “Барселона”ни Еврокубоклардан четлатиши мумкин

УЕФА коррупцион ишлар туфайли “Барселона”ни Еврокубоклардан бир мавсумга четлатиши мумкин.

Аввалроқ каталонияликлар 2016 йилдан 2018 йилга қадар RFEF техник ҳакамлар қўмитаси собиқ вице-президенти Хосе Мария Энрикес Негрейрага 1,4 миллион евро ўтказгани хабар қилинганди. Клуб бу бўйича баёнот берган ва Футбол федерацияси амалдорига ёш футболчилар ва ҳакамлар ҳақидаги ҳисоботлари учун тўлов амалга оширилганини таъкидлаганди. Шундан сўнг “Барселона” 2003 йилдан бери Негрейрага 4,7 миллион евро тўлагани аниқланди.

УЕФА қоидаларига кўра, клублар нафақат миллий балки, халқаро даражада ҳам ўйинларга таъсир ўтказиш усулларини қўллаши мумкин эмас.

Акс ҳолда, ташкилот клубни Еврокубокларда иштирок этишдан четлаштириш ҳуқуқини ўзида сақлаб қолади, бироқ бу дисквалификация фақат бир мавсум давом этиши мумкин. “Барселона” бўйича қарор июль ойида қабул қилиниши кутилмоқда.

“Барселона” Еврокубоклардан четлатилса, кейинги мавсумда бир неча миллион евролик зарар кўради, дея хабар беради El Confidencial. Ла Лиганинг янги қоидаларига кўра, каталонияликлар энди иқтисодий дастаклардан фойдалана олмайди. Шу сабабли дисквалификация улар учун жиддий зарба бўлади.