Тошкент вилоятида тез тайёрланадиган озиқ-овқат маҳсулотларини ишлаб чиқариш йўлга қўйилади
Ўзбекистон инвестициялар, саноат ва савдо вазири Лазиз Қудратов Mareven Food Holdings (Вьетнам) компанияси директори Нгуен Дуонг билан видеоконференция тарзида музокаралар ўтказди. Бу ҳақда ИССВ матбуот хизмати хабар берди.
Қайд этилишича, учрашувда 125 миллион долларлик тез тайёрланадиган озиқ-овқат маҳсулотлари, алкоголсиз ичимликлар, қуритилган сабзавотлар, чипслар ишлаб чиқарадиган йирик заводни қуриш бўйича навбатдаги тадбирлар атрофлича муҳокама қилинган. Лойиҳа Тошкент вилоятидаги “Ангрен” эркин иқтисодий зонаси ҳудудида амалга оширилиб, 800 та янги иш ўрни яратилади.
Музокаралар чоғида ветнамлик ҳамкорлар компания маҳсулотларини қабул қилиш ва Ўзбекистон ҳамда Марказий Осиё мамлакатлари бозорларига тарқатиш мақсадида Тошкент вилоятида логистика маркази фаолиятини ташкил этиш бўйича олиб борилаётган ишларнинг жорий ҳолати ҳақида ҳам сўзлаб берган. Ўзбекистон томони компаниянинг мамлакатдаги сармоявий ташаббусларини амалга оширишда ёрдам беришга тайёрлигини билдирган.
“Учрашув якунлари бўйича томонлар Ўзбекистонда Mareven Food Holdings компаниясининг ишлаб чиқариш ва логистика объектларини ишга тушириш ва янги иш ўринлари яратишни назарда тутган ҳолда лойиҳаларни муваффақиятли амалга ошириш юзасидан ҳамкорлик қилиш тартибини келишиб олдилар”, — дейилади хабарда.
Маълумот учун, Mareven Food Holdings қишлоқ хўжалиги маҳсулотларини қайта ишлаш, озиқ-овқат маҳсулотларини ишлаб чиқариш ва тарқатиш бўйича лойиҳаларга сармоя киритиш соҳасида фаолият юритади. Компаниянинг халқаро портфелига Rollton, Bigbon, Mareven Professional Food, Petra, Actibo брендлари киради.
Аввалроқ Ўзбекистон ва Вьетнам нефть-газ ва нефть-кимё саноатида қўшма лойиҳаларни амалга ошириши кутилаётгани тўғрисида хабар берилганди.
