Самарқандда ҳайдовчи бошқарувни йўқотиши сабабли Жигули каналга тушиб кетди

Самарқанд шаҳрида 23 март куни каналга тушиб кетган Жигули чиқариб олинди. Бу ҳақда вилоят Фавқулодда вазиятлар бошқармаси ахборот хизмати хабар берди. 

Хабарга кўра, ҳолат 23 март куни соат 11:11 да Самарқанд шаҳри “Оқсарой” МФЙ Рўдакий кўчасида содир бўлган. Мазкур кўча бўйлаб ҳаракатланиб кетаётган Жигули ҳайдовчиси бошқарувни йўқотиши натижасида ушбу ҳудуддан оқиб ўтувчи Сиёбча каналига тушиб кетган.

Фавқулодда вазиятлар бошқармасининг бир гуруҳ қутқарувчилари воқеа жойига етиб бориб, автомашинани каналдан олиб чиқди. Ҳодиса натижасида вафот этган ва тан жароҳати олганлар йўқ.