Ўзбекистоннинг уч ҳудудида электр ва газдан ноқонуний фойдаланганлар 930 млн сўмдан зиёд зарар етказди

Ўзбекистоннинг уч ҳудуди: Бухоро, Тошкент вилояти, Навоий да электр ва газдан ноқонуний фойдаланганлар 930 млн сўмдан зиёд зарар етказди. Бу ҳақда Иқтисодий жиноятларга қарши курашиш департаменти ахборот хизмати хабар берди. 

Хабарга кўра, Бош прокуратура ҳузуридаги департаментнинг Шофиркон туман бўлими томонидан ЭТК ходимлари билан ҳамкорликда ўтказилган терговга қадар текширувда, “Паттахон” МФЙда яшовчи У.И. ўз хонадонида таркибида олтин зарралари мавжуд бўлган тошларни майдалашга мўлжалланган яширин цех ташкил этгани аниқланган. У умумий фойдаланишдаги электр тармоғига ўзбошимчалик билан уланиб, 363,6 минг кВт/с электр энергиясидан ноқонуний фойдалангани маълум бўлган. 

Шунингдек, департаментнинг Вобкент туман бўлими томонидан ЭТК ходималари билан ҳамкорликда ўтказилган терговга қадар текширувда, “Паттахон” МФЙда яшовчи Р.О. ҳам ўз хонадонида таркибида олтин зарралари мавжуд бўлган тошларни майдалашга мўлжалланган яширин цех ташкил этиб, 383,6 минг кВт/с электр энергиясидан ноқонуний фойдаланганлиги аниқланган.

Шу каби департаментнинг Навоий вилоят бошқармаси томонидан ГТФ ходимлари билан ҳамкорликда ўтказилган терговга қадар текширувда, Қуйи Зарафшон ирригация тизимлари ҳавза бошқармаси ҳузуридаги насос станциялари ва энергетика бошқармаси масъул шахслари бошқарма маъмурий биносини ҳеч қандай ҳужжатсиз газ тармоғига ўзбошимчалик билан улаб, 195 минг куб табиий газдан ноқонуний фойдалангани аниқланган.

Бундан ташқари, департаментнинг Оҳангарон туман бўлими томонидан ЭТК ходимлари билан ҳамкорликда ўтказилган терговга қадар текширувда, “Г.” УК раҳбари Н.Б. қиёслов кўриги муддати ўтган ва назорат тамғалари бўлмаган электр ҳисоблагичдан ўзбошимчалик билан фойдаланиб, 88,3 минг кВт/с электр энергиясидан ноқонуний фойдалангани аниқланган. 

Департаментнинг Бекобод шаҳар бўлими томонидан ЭТК ходимлари билан ўтказилган терговга қадар текширувда, “М.Ш.” МЧЖ раҳбари Ж.Х.  МЧЖга қарашли дала майдонидаги насосларни умумий фойдаланишдаги электр тармоғига ўзбошимчалик билан улаб, 74,4 минг кВт/с электр энергиясидан ноқонуний фойдалангани аниқланган.

Шу билан биргаликда, департаментнинг Бухоро шаҳар бўлими томонидан ўтказилган терговга қадар текширувда, “Б.Л.” МЧЖ раҳбари Ф.Э. МЧЖ қарашли кўп қаватли уйини умумий фойдаланишдаги сув қувурига ичимлик суви ҳисоблагичисиз ўзбошимчалик билан улаб, 108,7 минг куб ичимлик сувидан ноқонуний фойдалангани аниқланган. 
 
Қайд этилишича, ушбу қонунбузилиш ҳолатлари оқибатида давлат ва жамият манфаатларига жами 931,8 миллион сўм зарар етказилган.

Мазкур ҳолатлар юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилиб, тергов ҳаракатлари ўтказилмоқда.