Ўзбекистон делегациясининг Афғонистонда “Толибон” расмийлари билан музокаралар ўтказгани тўғрисида хабар берилганди. “Дунё” агентлигининг ёзишича, Тошкент ва Кобул икки томонлама савдо-иқтисодий алоқаларни кенгайтириш, Афғонистон ҳудуди орқали турли транзит юкларни ташиш ҳажмини ошириш каби масалаларни муҳокама қилган.
ТИВ маълумотига кўра, Кобулда Ўзбекистон делегацияси Афғонистон бош вазири ўринбосари вазифасини бажарувчи мулла Абдул Ғани Бародар, ташқи ишлар вазири вазифасини бажарувчи Амирхон Муттақий, мудофаа вазири вазифасини бажарувчи мулла Ёқуб Мужоҳид, муваққат ҳукуматнинг бошқа аъзолари ва иқтисодий тузилмалар вакиллари билан қатор учрашувлар ўтказган.
Музокаралар чоғида ўзаро савдо-иқтисодий алоқаларни кенгайтириш, Афғонистон ҳудуди орқали турли транзит юкларни ташиш ҳажмини ошириш каби масалалар муҳокама қилинган.
Муҳим транспорт-энергетика лойиҳаларини амалга ошириш, хусусан, Термиз—Мозори-Шариф—Кобул—Пешовар темирйўлини қуриш, Сурхон—Пули-Хумри йўналиши бўйлаб электр тармоғини тортиш масалалари алоҳида кўриб чиқилган.
Томонлар ишнинг амалий босқичига тезроқ ўтиш зарурлигини таъкидлаган ва икки томонлама кун тартибидаги барча масалалар бўйича конструктив мулоқотни давом эттиришга тайёр эканликларини тасдиқлаган.
Мулоқот чоғида аёллар ҳуқуқларини ҳурмат қилиш ва ҳимоя қилиш, қизларнинг Афғонистонда таълим олишини таъминлаш, шунингдек, Термиз шаҳридаги Таълим маркази негизида афғон кадрларини тайёрлаш зарурлиги таъкидланган.
Учрашувлар доирасида сув-энергетика соҳасидаги ҳамкорлик масалаларига алоҳида эътибор қаратилган.
“Музокаралар ўзаро англашув руҳида ўтди ва муҳокама қилинган масалалар юзасидан томонлар ўзаро ҳамкорликни янада кенгайтириш истагини билдирди”, — дейилади хабарда.
Изоҳ (0)