Россия Хавфсизлик кенгаши раиси ўринбосари, собиқ президент Дмитрий Медведев Германия Адлия вазирлиги раҳбари Марко Бушманнинг Берлинда Россия президенти Владимир Путинни Германияга кириши биланоқ ҳибсга олишга мажбур бўлиши ҳақидаги баёнотига муносабат билдирди. Медведевнинг айтишича, бундай ҳаракат уруш эълон қилиш билан баробар бўлади.
“Тасаввур қилайлик — бу ҳеч қачон юз бермайдиган ҳолат экани аниқ, — лекин шунга қарамай, у амалга ошди деб тасаввур қилайлик. Ядровий давлатнинг амалдаги раҳбари, айтайлик, Германия ҳудудига келди ва ҳибсга олинди. Бу нима? Россия Федерациясига уруш эълон қилиш!”, — деди Медведев россиялик журналистлар билан суҳбатда.
Медведев Россия президенти Германияда ҳибсга олинган тақдирда, Россиянинг барча “маблағлари Бундестагга, канцлер идораси ва ҳоказоларга учишини” ваъда қилди. “У бу уруш эълон қилиш эканини тушунадими? Ёки ёмон ўқиганми?”, — дея иддао қилди Медведев. У Бушманни аҳмоқ ва илмсиз деб атади, Халқаро жиноий суднинг Владимир Путинни ҳибсга олиш ордери каби қарорлар эса “йирик салбий потенсиал” яратаётганини айтди.
Дмитрий Медведев, шунингдек, Ғарбнинг амалдаги раҳбарларини ёқтирмаслигини айтди. Шу билан бирга, унинг фикрича, “эртами-кечми вазият барқарорлашади ва алоқа тикланади”. У бу вақтга келиб Ғарбнинг амалдаги етакчиларининг салмоқли қисми “нафақага чиқади” деган умидда.
Бушман Германия Халқаро жиноий суд қарори туфайли Путинни Германияга қадам қўйса, ҳибсга олишга мажбур бўлишини айтганди. 17 март куни ХЖС Владимир Путин ва болалар омбудсмени Мария Лвова-Беловани ҳибсга олишга ордер берганди, чунки улар, судга кўра, “аҳоли (болалар)нинг ноқонуний депортацияси билан боғлиқ ҳарбий жиноятлар учун жавобгар” деб топилган. Кремл суд қарорини “қонун нуқтаи назаридан аҳамиятсиз” деб атади. Россия тергов қўмитаси ХЖС прокурори ва судьяларига нисбатан иш очди, Германия Адлия вазирлиги раҳбарининг баёнотига ҳуқуқий баҳо бериладиган бўлди.
Изоҳ (0)