Бухорода икки йигит беҳаё видеоларини тарқатмаслик учун танишидан пул талаб қилди

Бухоро шаҳрида 2005 йилда туғилган икки йигит ўз танишидан беҳаё видеоларини тарқатмаслик учун пул талаб қилди. Бу ҳақда вилоят Ички ишлар бошқармаси ахборот хизмати хабар берди. 

Хабарга кўра, Бухоро шаҳрида яшовчи 2005 йилда туғилган йигитлар бир гуруҳ бўлиб, шахс учун сир сақланиши лозим бўлган маълумотларни ошкор қилиш билан қўрқитиб, Жондор туманида яшовчи таниши бўлган қизга таҳдид қилиб келган. Улар қизни беҳаё видеоларини тарқатиш ва шарманда қилиш билан қўрқитган. 

Маълум бўлишича, йигитлар 6 февралдан бошлаб ундан бир неча бор пул талаб қилган. Охирги маротаба эса талаб қилинган 15 миллион сўмдан 9 миллион 900 минг сўм олган. Шундан сўнг жабрланувчини яна 4 миллион 100 минг сўм беришга мажбур қилган. 

Қизнинг вилоят ИИБга мурожаати асосида тезкор тадбир ўтказилган. Тадбир давомида ушбу икки йигит Бухоро шаҳар педогогика институти олдида талаб қилинган пулларни олган вақтида ушланган. 

Ҳолат юзасидан Жиноят кодексининг 165-моддаси 2-қисми билан жиноий иш қўзғатилиб, ҳозирда тергов ҳаракатлари олиб борилмоқда.