“Буни фуқаролик жамияти ва фаолларнинг ғалабаси деб биламан”. Саида Мирзиёева аёллар ҳуқуқлари бўйича қонунчиликка киритилган ўзгартиришлар ҳақида

Олий Мажлис Қонунчилик палатаси томонидан Ўзбекистон Республикаси Жиноят ва Маъмурий жавобгарлик кодексларига аёллар ҳамда вояга етмаганларни зўравонликдан ҳимоя қилиш бўйича ўзгартиришлар тўплами қабул қилинди. Саида Мирзиёева мазкур тўплам қабул қилингани бўйича муносабат билдирди. 

Қонун лойиҳасининг асоси Сенат ҳузурида ташкил этилган фаоллар ва экспертлардан иборат ишчи гуруҳи томонидан ишлаб чиқилган бўлиб, улар лойиҳанинг энг сўнги нуқтасига қадар Қонунга киритилаётган ўзгартиришларни ёқлаб ҳимоя қилди. Хусусан, оиладаги зўравонлик жиноий ҳуқуқбузарликлар туркумига ўтказилди, иқтисодий ва психологик зўравонлик, шунингдек, вояга етмаганларга нисбатан зўравонлик учун жазо кучайтирилди. Саида Мирзиёева бу нафақат Ўзбекистон аёлларининг, балки барча тафаккурли, илғор инсонларнинг ғалабаси эканини таъкидлади. 

“Буни фуқаролик жамияти ва фаолларнинг ғалабаси деб биламан. Соғлом фикр ва адолатнинг ғалабаси. Биз ушбу муваффақиятлар учун узоқ ва машаққатли ҳаракатларни амалга оширдик, лекин қонунчилигимизда бу каби ўзгартиришлар замон талабларига хос ва инсонпарварлик учун ўта аҳамиятли эканлигини биргаликда исботлай олдик.  Олдинда бажаришимиз лозим бўлган ишлар жуда кўп, бироқ муваффақият доимо илҳомлантиради. Ушбу ўзгартиришларни қўллаб-қувватлаган, ҳужжатлар устида иш олиб борган ва бу ғояларни жамиятимизда  тарғиб қилган барчага миннатдорчилик билдираман. Бу нафақат Ўзбекистон аёлларининг, балки барча тафаккурли, илғор инсонларнинг ғалабаси”, деб ёзади Саида Мирзиёева.