Саҳнада Гуласал-у Наргис, Равшан Комилов ва Козим Қаюмов: Тошкент вилоятида машҳурлар иштирокида бўлиб ўтган Наврўз — суратларда

Барча вилоятларда бўлгани каби янгиланиш ва яшариш байрами Наврўзи олам Тошкент вилоятида ҳам кўтаринки кайфиятда кутиб олинди. Бу ҳақда “Дарё”га вилоят ҳокимлиги ахборот хизмати хабар берди.

Қайд этилишича, Наврўз тантаналарида Ўзбекистонда машҳур хонанда-ю, халқ артистлари иштирок этган. Саҳнада Гуласал Абдуллаевадан тортиб хонанда Наргисгача, Равшан Комиловдан Козим Қаюмовгача кўриниш бериб, аҳоли кайфиятини кўтаришга уринган.

“Шуни алоҳида таъкидлаш мумкинки, анъанага мувофиқ, улуғ айём кунлари вилоятимизда 100 дан ортиқ ижтимоий объектлар, ишлаб чиқариш ва хизмат кўрсатиш корхоналари фойдаланишга топширилди. Хусусан, 30 га яқин маҳалла фуқаролар йиғини бинолари, 11 та спорт объектлари, умумтаълим мактаблари ва мактабгача таълим ташкилоти ҳамда 3 та тиббиёт муассасалари мукаммал таъмирланиб аҳоли ихтиёрига берилди. Шундан 136 та сув таъминоти ва оқова сув объектларида қурилиш-таъмирлаш ишлари олиб борилиб, бугун кўплаб оилаларга тоза ичимлик суви кириб борди”, — дейди вилоят ҳокимлиги ахборот хизмати раҳбари Беҳзод Қобулов.

Қўшимча қилинишича, Наврўз тантаналари доирасидаги тадбирлар Меҳрибонлик, Мурувват ҳамда Саховат уйлари, махсус мактаб-интернатларида ҳам давом этган.

“Ушбу масканларда вилоят ҳокимлиги бўлим ва бошқармалари, жамоат ташкилотлари томонидан байрам дастурхонлари ёзилиб, концерт дастурлари намойиш этилмоқда. Қариялар, ногиронлар, беморлар ва муҳтожлар ҳолидан хабар олинди”, — дейди масъул.