Африкага ёпирилган “Фредди” бўрони қурбонлари сони 500 кишидан ошди
Африка жануби-шарқига ёпирилган “Фредди” тропик бўрони Мадагаскар, Малави ва Мозамбикда камида 522 кишининг умрига зомин бўлди. Бу ҳақда ушбу мамлакатлар ҳукуматларига таяниб, Deutsche Welle агентлиги хабар берди.
Қурбонларнинг аксарияти Малави ҳисобига тўғри келмоқда — у уч мамлакатдан энг кичиги ва дунёдаги энг қашшоқ давлатлардан биридир. Ушбу мамлакатда табиий офат оқибатида 438 киши ҳалок бўлган. Яна ёғингарчилик, сув тошқинлари ва кўчкилар оқибатида 345 га яқин одам жароҳатланган. Мамлакат жанубида фавқулодда ҳолат режими эълон қилинди.
Мозамбик президенти Фелипе Нюсининг сўзларига кўра, бўрон оқибатида мамлакатда камида 67 киши ҳалок бўлган. Мадагаскар ҳукумати қурбонлар сони 17 кишини ташкил этаётганини билдирган.
Ҳинд океанида шаклланган “Фредди” тропик бўрони 21 февраль куни Мадагаскарга ёпирилган эди. Шундан кейин у кўрфаз орқали қитъага ўтиб, яна оролга “қайтган”, 11 мартда Мозамбик ва Малави ҳудудига ёпирилган — унинг юзага келганига бир ойдан ошди. Жаҳон метеорология ташкилоти маълумотларига кўра, “Фредди” энг узоқ вақт кузатилган бўронга айланиши мумкин.
