Самарқандда фарзандини қийноққа солган аёлга нисбатан жиноят иши қўзғатилди

Самарқанд вилояти Каттақўрғон туманида аёл эри билан жанжаллашиб қолгани сабабли фарзандини қийнагани тўғрисида хабар берилганди. Вилоят ИИБнинг маълум қилишича, ҳолат юзасидан аёлга нисбатан жиноят иши қўзғатилган.

Ижтимоий тармоқларда тарқалган видеода аёл боласини бир қўлида кўтариб, бўйнидан бўғиб, тасвирга олганини кўриш мумкин. “Дадажон, мен ўляпман де. Болаларимнинг жонини оламан”, деб таъкидлаган аёл.

Вилоят Ички ишлар бошқармаси ахборот хизматига кўра, 2000 йилда туғилган Х.У. Россияда ишлаётган эри билан ўртасида юзага келган келишмовчилик оқибатида жаҳл устида боласини қийнаб, тасвирга олиб, турмуш ўртоғига юборган.

Болаларини қийнаган аёл ҳолати юзасидан Каттақўрғон тумани ИИБ ҳузуридаги Тергов бўлими томонидан Жиноят кодексининг 110-моддаси (қийнаш) 2-қисми “а” банди билан жиноят иши қўзғатилиб, фуқаро Х.У.нинг ҳимоя ҳуқуқи таъминланган ҳолда жиноят ишида гумонланувчи сифатида жалб этилган.

Ҳозирда тергов ҳаракатлари олиб борилмоқда. Ушбу оила ҳамда болалар билан ишлаш учун мутахассис психологлар жалб этилган.