Бразилиянинг Embraer конгломерати иштирокида “Авиация келажаги: Ўзбекистон. Embraer куни” мавзусида давра суҳбати бўлиб ўтди, деб хабар беради ЎзА.
Маълум қилинишича, давра суҳбати чоғида Embraer ҳаво кемалари тақдимоти ўтказилиб, ўзаро ҳамкорлик истиқболи муҳокама қилинган. Embraer конгломерати вице-президенти Жоао Педро Таборда Марказий Осиё минтақасида авиация ва туризм соҳаси шиддат билан ривожланаётгани, авиация бозорида янги хусусий авиакомпаниялар пайдо бўлаётганини қайд этган. Қисқа ва ўрта масофага мўлжалланган ҳаво кемаларини мамлакатда фаолият олиб бораётган авиакомпанияларга қулай шарт асосида етказиб беришга тайёр эканлигини билдирган.
“Шу билан бирга тадбир давомида мамлакатимизга ташриф буюраётган сайёҳлар сонини ошириш ва туристларга қулайлик яратиш мақсадида халқаро авиақатнов йўналишларини диверсификация қилиш, ўрта масофага халқаро ва ички қатновни жорий этишда Embraer томонидан ишлаб чиқарилаётган ҳаво кемалари афзаллиги юзасидан фикр алмашилди”, — дейилади хабарда.
Тадбир якунида Embraer дунё бўйлаб амалга ошираётган махсус тарғибот дастури доирасида “E195-E2” ҳаво кемасини 2023 йил июнь ойида Ўзбекистонга олиб келиш ҳамда авиакомпания ва туризм соҳаси вакиллари учун Аsia connect анжуманини ташкил этишга келишиб олинган.
Компания ҳақида
Embraer концерни Бразилия ҳукумати томонидан 1969 йилда ташкил этилган ва асосан ички бозор учун ишлаган. 1994 йилда компания хусусийлаштирилган, 2000 йилда эса IPO ўтказилган.
У тижорат, хусусий, ҳарбий ва қишлоқ хўжалиги эҳтиёжлари учун самолётлар ишлаб чиқаради ва бу соҳада Airbus ва Boeing’дан кейин дунёда 3-ўринни эгаллайди.
2022 йилда Embraer мижозларга 57 та тижорат лайнери ва 102 та бизнес-жет етказиб берди. Конгломерат томонидан ишлаб чиқарилган, 70 дан зиёд мамлакатга экспорт қилинган 2 000 дан ортиқ ҳаво кемасидан айни пайт 130 дан ортиқ авиакомпания фойдаланмоқда.
Маълумотларга кўра, минтақавий ўрта сиғимли (150 ўрингача) йўловчи ташувчи ҳаво кемаси ишлаб чиқариш бўйича етакчи саналган ушбу корхона жаҳон бозорида айни турдаги учоқ савдосининг 29 фоизини қоплайди.
Изоҳ (0)