АҚШнинг собиқ президенти Дональд Трамп бу “жасоратини йўқотган” мамлакатда “янги Америка келажагини яратиш” учун 10 тагача футуристик “озодлик шаҳарлари”ни қуришни таклиф қилди. Бу ҳақда CNN телеканали хабар бермоқда.
Трамп президент бўлгач, ўзлаштирилмаган ерларда тахминан Вашингтон ҳудудига тенг 10 тагача “озодлик шаҳарлари”ни ижарага бериш учун тендер эълон қилишини айтди. Собиқ президент америкаликлар ўтмишда чегарада шаҳарлар қуриб, ёввойи далада янги мамлакат яратганини, энди эса улар коинотга сунъий йўлдошларни учиришаётганини эслади. Унинг сўзларига кўра, “озодлик шаҳарлари”ни қуриш Америка орзусини қайтаришга ёрдам беради.
“Биз чиндан ҳам мамлакатимизда яна янги шаҳарлар қурамиз”, — деди 45-президент. “Бу озодлик шаҳарлари чегараларни қайта очади, Америка тасаввурларини қайтадан уйғотади ва юз минглаб ёшлар, барча меҳнаткаш оилаларга уй-жой, бошқача айтганда Америка орзусига эга бўлиш учун янги имконият беради”.
Шунингдек, у ушбу футуристик шаҳарлар аҳолиси учар машиналардан фойдалана оладиган бўлишини қўшимча қилди. Трамп АҚШ ва Хитойнинг йирик авиакомпаниялари, автомобиль ишлаб чиқарувчилари ва бошқа компаниялар томонидан вертикал учиш ва қўниш аппаратларини ишлаб чиқиш бўйича ишлар аллақачон олиб борилаётганини таъкидлади. Шу билан бирга, Трампнинг фикрича, АҚШ Хитойни ортда қолдириб, бу соҳада етакчилик қилишга қодир.
2022 йил 15 ноябрда Дональд Трамп 2024 йилда яна президентликка номзодини қўйиш истаги борлигини маълум қилди. Унинг янги шаҳарлар қуриш ғояси 2023 йил 28 январда бошлаган сайлов кампанияси доирасида эълон қилинган.
Изоҳ (0)