Футбол бўйича Осиё Кубоги—2023 бўлиб ўтадиган сана маълум бўлди.
Футбол мутахассиси Алишер Никимбаевнинг хабар беришича, мусобақа 2024 йилнинг 12 январидан 10 февралига қадар бўлиб ўтади. Таъкидлаш керакки, бу сафарги қитъа биринчилиги аввалгиларидан кечроқ бошланади ва кечроқ якунланади. 2011 йил Қатарда ўтказилган мусобақа 7 январдан 29 январга қадар, 2015 йил Австралиядаги турнир 9 январдан 31 январгача, 2019 йил БААда ўтган мусобақа 5 январдан 1 февралга қадар давом этганди.
“Мусобақанинг бир ҳафта кеч бошланиши футбол мавсуми ноябрь—декабрь ойларида якунланадиган жамоаларга (Ўзбекистон, Тожикистон, Қирғизистон, Хитой) тайёргарлик учун қўшимча вақт беради”, — деб ёзади Никимбаев.
Эслатиб ўтамиз, 2023 йилги мусобақа Хитойда ўтиши белгиланганди. Бироқ мамлакат коронавирус билан боғлиқ вазият сабаб Осиё Кубогини ўзида ўтказа олмаслиги маълум бўлди ва 2022 йилнинг май ойида Хитойдан мезбонлик олиб қўйилганди. Қатардан ташқари ушбу мусобақа мезбонлиги учун Жанубий Корея ва Индонезия ҳам даъвогарлик қилганди. Якунда ОФК Қатар вариантини маъқул кўрган эди.
Изоҳ (0)