Туркманистон президенти Сердар Бердимуҳамедов 21—22 февраль кунлари расмий ташриф билан Баҳрайнда бўлиб, у ерда ўтказилган тадбирларда иштирок этди, Қирол Ҳамад бин Исо Ал-Халифа билан учрашди ва совғалар алмашди. Бу ҳақда “Туркменистан сегодня” нашри хабар бермоқда.
Бердимуҳамедов Баҳрайн Иқтисодий тараққиёт кенгашига ташриф буюрган, унга қиролликнинг макет харитаси кўрсатилган ҳамда инвестиция лойиҳалари ва ҳамкорлик имкониятлари ҳақида айтиб берилган.
Туркманистон президенти Қирол Ҳамад бин Исо ал-Халифа билан музокараларда икки томонлама ҳамкорликни муҳокама қилган. Учрашув якунлари бўйича қўшма баёнот, шунингдек, маданият, таълим, денгиз транспорти ва метрология соҳаларида ҳамкорликка оид қатор меморандум ва битимлар имзоланган.
Қирол Бердимуҳамедовга Шайх Исо бин Салмон Ал-Халифа номидаги биринчи даражали орденни топширган – бу Баҳрайн қироллигининг олий мукофотидир.
Шунингдек, расмий тадбирлар якунида Туркманистон президенти қирол отхонасига олиб борилиб, у ерда унга иккита араб оти совға қилинган. Ўз навбатида Сердар Бердимуҳамедов Баҳрайн Миллий музейига туркман гилами ва отаси Гурбангули Бердимуҳамедовнинг Ахалтеке отлари ҳақидаги китобини совға қилган.
Туркманистон президенти баҳрайнлик ҳамкорларни келаси йилда бизнес ва сармоявий форумлар ўтказишга ҳамда қирол Ҳамад бин Исо ал-Халифани ташриф буюришга таклиф қилган.
Изоҳ (0)