Бугун барчамиз Мерайя Керини беқиёс вокаллари ва бетакрор қўшиқлари туфайли биламиз. Бироқ кўплаб мукофотлар, шу жумладан 5 та “Грэмми” мукофоти соҳибаси бундай муваффақиятга қандай эришгани, қандай қийинчиликларни бошдан кечиргани ҳақида кўпчилик билмайди.
Мерайя Кери собиқ опера хонандаси Патрисия Хикки ҳамда афро-америкалик ва венесуэлалик муҳандис Альфред Рой Кери оиласида туғилган. Мерайя уларнинг учинчи, кенжа фарзанди эди. Қизнинг исми “Олтин Калифорния” мусиқий фильмидаги “Улар шамолни Мерайя деб аташади” (Theу Call the Wind Мariya) қўшиғи шарафига берилган.
Тез орада ота-онаси ажрашишади. Шундан сўнг Мерайя отаси билан деярли алоқа қилмайди, онаси эса болаларини боқиш учун учта жойда ишлайди. Мерайя бошланғич мактабда бўлганида ҳам, кўпчилик қизнинг адабиёт ва мусиқага мойиллигини ва ўрта мактабда у аллақачон шеър ёзишни бошлаганини пайқашади.
Онаси қизига вокал ўргатишни бошлайди, лекин ҳеч қачон унга опера қўшиқчиси бўлиши кераклигини айтмайди, чунки Мерайянинг сўзларига кўра, “у қаттиққўл она эмасди”. Керининг ўзи бир неча бор опера унинг карерасини кўтаришга таъсир қилмаганини айтади. Бир куни онаси қизига шундай деган: “Сен мен каби қўшиқчиларнинг камида ярмидек бўлишингга умид қилишинг мумкин”. Мерайя тез-тез мактабдаги дарсларни қолдирган, чунки у овоз ёзиш студиясига борарди. Шундай қилиб, синфдошлари унга Мираж лақабини беришди.
Ўрта мактабни тугатгандан сўнг Кери Манҳеттендаги 2 хонали квартирага кўчиб ўтади, у ерда гўзаллик мактаби курсларига боради ва бир муддат официант ҳам бўлиб ишлади — кейинчалик ўзи тан олганидек, у “дунёдаги энг ёмон официант” бўлган.
1988 йилда қиз 19 ёшлигида, у Columbia Records раҳбари Томми Моттола билан бир тадбирда танишиб қолади ва унга ўзининг демолари ёзилган кассетани совға қилади. Уйга кетаётиб, қўшиқларни тинглаган Моттола дарҳол ҳайдовчидан орқага қайтишни сўрайди, лекин қўшиқчи бу вақтга қадар тадбирдан чиқиб кетганди. Моттола 2 ҳафта давомида Керини қидиради, кейин улар шартнома имзолайдилар ва 1-альбомни чиқаришга тайёргарлик кўришади. 1990 йил 5 июнда қиз биринчи марта қўшиқ куйлаб, омма олдида пайдо бўлади.
Мерайя Керининг дебют альбоми 1990 йилда чиқади ва 11 ҳафта давомида Billboard 200 рўйхатида биринчи ўринни эгаллайди. 1991 йилда “Гремми” мукофотининг тақдирлаш маросими бўлиб ўтади, унда қўшиқчи “Энг яхши янги ижрочи” ва “Энг яхши аёл поп-вокал ижроси” номинацияларида 2 та мукофотга сазовор бўлади. Шу билан бирга, Кери тижорат муваффақиятига эриша олмаган, аммо мусиқий уфқда из қолдирган 2-альбомни чиқаради. 1990 йилларнинг ўрталарида хонанда миннатдорлик сифатида онасига уй совға қилади.
1993 йилда Мерайя Томми Моттолага турмушга чиқади, у биринчи альбомни ёзиш пайтидаёқ учраша бошлашганди. Бироқ аста-секин уларнинг муносабатлари ёмонлаша бошлайди. Хонанданинг таъкидлашича, эри унинг бутун ҳаётини бошқаришни истаган: “У мендан анча катта бўлиб, мени кўпчиликдан узоқлаштиришга қодир эди. Мен бу асирликдан ҳеч қачон қутулолмайман деб ўйлагандим”. 3 йиллик турмушдан кейин улар ажралишга қарор қилишади. Мерайянинг айтишича, никоҳининг бузилиши у учун озодлик бўлиб, уни янги ҳаёт деб билган. Кейинчалик у қўшиқчи Луис Мигел билан 1998 йилдан 2001 йилгача учрашиб юрган.
Шу билан бирга, Кери ўз ижодида агар поп мусиқасини тўлиқ рад этмаса, ҳеч бўлмаганда қисман қўшиқларида ҳип-ҳоп ва R&B элементларидан фойдалана бошлайди. 1999 йилда хонанда ўзининг 7-диски (“Камалак”)ни чиқаради, у ўша пайтда сотувнинг биринчи ҳафтасидаёқ хонанданинг энг кўп сотилган альбомига айланади. Шу билан бирга, Кери Billboard версиясига кўра ўн йилликнинг энг яхши қўшиқчиси деб тан олинади ва 2000 йилда World Music Award мукофотини топшириш маросимида у “Мингйилликнинг энг кассабоп хонандаси” мукофотига сазовор бўлди.
2001 йилда Кери соғлиғи билан боғлиқ муаммоларни бошдан кечира бошлади, у асабий тушкунлик туфайли касалхонага ётқизилди. Шу билан бирга, Мерайяга биполяр бузилиш ташхиси қўйилган, аммо у буни 17 йилдан кейингина тан олади.
Кери 2 ҳафта давомида шифокорлар назоратида бўлади, кейинчалик эса узоқ вақт омма олдида кўринмайди. 2002 йилда у “Аёллар мантиғи” фильмида рол ўйнайди, фильмдаги хонанданинг ижроси барчада катта таассурот қолдиради. Шу билан бирга, унинг 9-чи Чармбраcелет альбоми чиқади — танқидчилар уни хонанда карьерасидаги энг ёмон альбом деб аташган.
Кейинги “Мимининг озодлиги” альбоми ҳам жамоатчилик, ҳам танқидчиларнинг севгиси ва эътирофига сазовор бўлади. Кўпчилик, ниҳоят, қўшиқчи аввалги ҳолатига қайтганини айтишади. Кейинчалик у мусиқа ёзишни ва фильмларда ўйнашни давом эттиради, хусусан, “Теннесси”, “Зоҳан билан ҳазиллашманг” фильмларида иштирок этади, “Хазина” фильмидаги ижроси мукаммал деб тан олинади.
2008 йилда қўшиқчи “Be Be” қўшиғига клип олиш пайтида актёр ва мусиқачи Ник Каннон билан танишади, кейинчалик унга турмушга чиқади. 2011 йилда хонанда эгизак фарзандларни дунёга келтиради: қизи Монро ва ўғли Мароккано Скотт. Интервьюлардан бирида Керидан турмуш ўртоғи билан ўртасидаги 11 ёш фарқ ҳақида сўрашганда, у “Ёш бу — шунчаки рақам” деб жавоб беради. Бироқ 2014 йилда оила бузилади ва ажралиш жараёни 2016 йилда якунланади.
2012 йил март ойида Кери фарзандлари туғилгандан бери биринчи марта омма олдида чиқиш қилади, фильмларда рол ўйнашда ва қўшиқ ёзишда давом этади. 2015 йилда у ҳатто ўзини режиссёр сифатида синаб кўради — ўзи бош ролни ўйнаган “Рождество оҳанги” фильмини суратга олади. Шу билан бирга, рассом ўзининг янги шоусини эълон қилад. 2016 йилда хонанда ҳақида ҳужжатли фильм чиқади. “Менимча, бу менинг аслимни кўрсатиш учун яхши имконият, чунки энг содиқ мухлисларим ҳам мен ҳақимда тўғри тасаввурга эга эмаслар”.
2015 йилда Мерайя миллиардер Жеймс Пакер билан учрашишни бошлайди. Январда улар ўзларининг унаштирилганликларини эълон қилишади, аммо кейин уни бекор қилишади. 2016 йилда Кери хореограф Брайан Танака билан муносабатларни бошлайди ва ҳозиргача улар бирга.
Фаолиятининг дастлабки йилларида Кери саҳнага чиқишдан қўрқади. Хонанда қўшиқларни ижро этиш пайтида шунчаки саҳнада туришни афзал кўриши билан машҳур. Баъзи танқидчилар буни ўзига ишончи йўқлиги билан боғлашса, бошқалари эса шу тарзда у вокалга эътибор қаратади, деб айтишади.
Қўшиқчининг айтишича, композицияларининг аксарияти автобиографик характерга эга. Кери учун вокал уни илҳомлантирган ҳис-туйғулар эмас, балки профессионалликдир.
Кери жуда кўп мукофотларни қўлга киритади, жумладан 5 та “Гремми”. Мерайя 2015 йилда Голливуд Шон-шараф хиёбонида ўз юлдуз га эга бўлади. Унинг Меррй Christmas альбоми 15 миллион нусхадан кўпроқ сотилган ва бу барча даврларнинг энг кўп сотилган Рождество альбомига айланди. Аll I Want for Christmas Is You қўшиғи эса Гиннеснинг рекордлар китобига уч марта кирган. У Майкл Жексон ва Элвис Преслидан кўра кўпроқ хит қўшиқларга эга.
Мерайя Керининг жуда ҳашаматли турмуш тарзини олиб борадиган бир нечта итлари бор. Хонанда уларни курорт муолажалари билан эркалайди, авиакомпания чекловларидан қочиш учун улар билан шахсий самолётида саёҳат қилади ва тез-тез ўзи билан таътилга олиб боради.
Мерайя бир кун келиб бой ва машҳур бўлишини ўзига қайта-қайта айтган пайтини аниқ эслайди: “Мен 5-6 ёшда эдим. Опам билан супермаркет парковкасида онамнинг эски машинаси ойнасидан бадавлат одамларга қараб ўтирардим. Кейин мен албатта, юлдуз бўламан ва энг яхши нарсаларни сотиб оламан, дедим”.
Шунингдек, хонанда ўз интервьюларидан бирида ҳеч қачон таслим бўлмаслик кераклигини, агар инсон ўзига ишонса ва нима истаётганини билса, албатта ўзи хоҳлаган нарсага эришишини айтади.
Изоҳ (0)