Қовурилган колбаса солиб тайёрланадиган шаурма рецепти 

Ўзингизга ёққан колбаса, салат барги ва сабзавотлардан мазали таъмга эга бўлган шаурмани тайёрлаб кўришингиз мумкин. Унга бошқа сабзавотларни ҳам қўшсангиз бўлади.

Керакли масаллиқлар:

• колбаса — 300-350 гр
• ўсимлик ёғи — 1-2 қошиқ
• бодринг — 2-3 дона
• салат барги — 1 боғ
• юпқа лаваш нони — 2 дона
• “морковча” — 200 г
• майонез — таъбга кўра

Тайёрланиши:

1. Колбасани майда бўлакларга бўлиб олинг, товага ёғ солиб қиздиринг ва уни қизаргунга қадар бир неча дақиқа давомида қовуриб олинг. Қовурилган колбасани қоғоз сочиққа қўйинг.
2. Бодрингни юпқа қилиб тўғраб олинг. Салат баргини қўлингиз билан бўлакларга бўлиб олинг.
3. Лаваш хамирини ёйинг. Устига колбаса, сабзи, салат барги, бодрингнинг ярмини солинг, майонез қўшинг ва ўрама ҳосил қилинг. Худди шу тарзда иккинчи шаурмани тайёрланг.

Ёқимли иштаҳа!