Ўзбекистонда барча объектлар лойиҳасида сейсмик хавфсизлик масалалари тўлиқ кўзда тутилган бўлса қурилишига рухсат берилади
Ўзбекистонда қурилиши якунланган объектларда барча норма ва талаблар тўлиқ бажарилгани ҳамда иш сифатли амалга оширилгани тасдиқлангандан сўнг, фойдаланишга рухсат берилади. Бу ҳақда Қурилиш ва уй-жой коммунал хўжалиги вазирлиги ахборот хизмати раҳбари Саидносир Усмонов 9 февраль куни бўлиб ўтган брифингда айтиб ўтди.
Саидносир Усмонов Туркияда юз берган зилзиладан сўнг Ўзбекистонда қурилиш сифати қандайлиги, бино ва иншоотларнинг зилзилабардошлиги қай даражада талабга жавоб бериши одамларни хавотирга солаётгани сабабли бу борада қонунчиликда белгиланган талаблар ҳақида маълумот берди.
“Аввало, бу борада мамлакатимизда мустаҳкам норматив ҳуқуқий база яратилганини таъкидлаш керак. Амалдаги ҳужжатлар асосида қурилиш объектларида, аввало, инсонларнинг хавфсизлигини таъминлаш бўйича муайян тизим асосида ишлар ташкил қилинади. Хусусан, маълум бир объектнинг лойиҳасини тайёрлаш учун дастлаб архитектура режалаштириш топшириқлари ишлаб чиқилади, сўнг лойиҳа таклифи архитектура кенгаши томонидан кўриб чиқилади”, — дейди вазирлик ахборот хизмати раҳбари.
Унинг қайд этишича, республика ҳудудлари сейсмик балл кўрсаткичлари бўйича зоналарга бўлинган. Шундан келиб чиққан ҳолда, бош режаларда ҳудудларда объектларни жойлаштиришда мазкур сейсмик балл кўрсаткичлари инобатга олинади. Лойиҳа ташкилотлари томонидан объектлар ҳудуднинг белгиланган сейсмик баллидан келиб чиққан ҳолда лойиҳалаштирилади.
Бундан ташқари, объектни лойиҳалаштиришдан олдин у жойлашган ер майдони бўйича топографик тасвир ва геологик тадқиқот амалга оширилади, шунингдек, грунт таркиби ва хусусиятлари, сизот сувлар сатхи ва шу каби бошқа масалалар ҳам ўрганилади.
Ушбу тадқиқот натижаларидан келиб чиққан ҳолда, объектни жойлаштириш, унинг қаватлар сони, фундаменти, конструксиялари ва габарит параметрлари бўйича лойиҳа ечимлари танланади. Мазкур жараёнлардан кейин объектлар бўйича лойиҳа ҳужжатларини ишлаб чиқилади.
Бунда, сейсмик хавфсизлик ва мустаҳкамликни таъминлашга қаратилган шаҳарсозлик нормалари ва қоидаларига қатъий амал қилинади. Объектнинг лойиҳа ҳужжатлари тайёр бўлгандан сўнг, ваколатли эксперт ташкилотлари томонидан экспертизадан ўтказилади. Бунда ҳам сейсмик хавфсизлик ва мустаҳкамлик масалалари бўйича алоҳида кўриб чиқилади.
“Қайд этиш керакки, мураккаблик дажаражси 4-тоифа объектлари қўшимча равишда Фанлар академияси ҳузуридаги Сейсмология институти томонидан ҳам сейсмик экспертизадан ўтказилади. Ушбу тизим бўйича президент ва ҳукумат қарорлари ҳам қабул қилиниб, алоҳида тартиблар белгиланган. Объект лойиҳасида сейсмик хавфсизлик ва мустаҳкамлик масалалари тўлиқ кўзда тутилганлиги бўйича ижобий экспретиза хулосалари олингач, қурилиш ишларини бошлашга рухсат берилади”, — дейди Саидносир Усмонов.
Объектларнинг қурилиш жараёнида эса 4 хил турдаги назорат ишлари юритилади. Яъни, пудрат ташкилотининг ички назорати, лойиҳа ташкилотининг муаллифлик назорати, буюртмачи ташкилотининг техник назорати ва Инспекциянинг давлат назорати юритилади. Объектга олиб келинган қурилиш материаллари ва буюмлар сифати ҳам назоратга олинади. Бу тартиб республикнинг барча қурилиш объектларига тааллуқлидир.
“Таъкидламоқчимизки, бугунги кунда қурилиш ишларида аввало сифат ва назоратга бирламчи масала деб қаралмоқда ва бу ишлар қатъий давом эттирилади”, — дейди Қурилиш ва уй-жой коммунал хўжалиги вазирлиги ахборот хизмати раҳбари.
