Фарғонада йўлнинг қатнов қисми ўпирилиб тушди

Фарғона вилоятида йўлнинг қатнов қисми ўпирилиб тушгани сабабли йўл-транспорт ҳодисаси содир бўлди. Бу ҳақда вилоят йўл ҳаракати хавфсизлиги ахборот хизмати хабар берди. 

Хабарга кўра, ижтимоий тармоқларда тарқалган йўлнинг қатнов қисми ўпирилиб тушганлиги акс этган фотохабар бошқарма томонидан ўрганиб чиқилди. Ўрганишда 1 февраль куни  4K 923 Яйпан—Рапқон—Бешариқ—Чилмахрам автомобиль йўлининг  25-километрида ерости сизот сувларининг йўл қопламаси остига тўплангани натижасида ўпирилиш содир бўлгани аниқланган. 

Қайд этилишича, мазкур ҳолат шу куннинг ўзида керакли куч-воситалар ёрдамида бартараф этилиб, автомобиллар қатнови тикланган. Йўлдаги носозлик туфайли содир бўлган йўл-транспорт ҳодисаси натижасида Nexia русумли транспорт воситаси ҳайдовчиси, дастлабки маълумотга кўра, енгил тан жароҳати олган. 

Маълум қилинишича, ҳозирда ушбу ҳолат юзасидан Бешариқ тумани ИИБ ЙҲXГ томонидан ўрганиш ишлари олиб борилмоқда.