Самарқандда фуқароларни Мексика орқали АҚШга юбормоқчи бўлган жиноий гуруҳнинг яна бир аъзоси ушланди

Самарқанд вилоятида фуқароларни Мексика орқали АҚШга жўнатмоқчи бўлган жиноий гуруҳнинг яна бир аъзоси қўлга тушди. Бу ҳақда ЎзА хабар берди. 

Хабарга кўра, Давлат хавфсизлик хизмати Самарқанд вилояти бошқармаси ҳамда вилоят Ички ишлар бошқармаси  ходимлари ҳамкорлигида ўтказилган тадбирда фуқароларни айланма йўллар билан АҚШга ноқонуний жўнатаётган жиноий гуруҳ аъзоларидан бирининг фаолиятига чек қўйилди. Бухорода яшовчи, 1995 йилда туғилган фуқаро ноқонуний йўллар билан Европа иттифоқи давлатлари ва Мексика орқали АҚШга жўнатиш билан шуғулланган.

Маълум қилинишича, у самарқандлик фуқарони АҚШга юбориш учун 15 000 АҚШ доллари сўраган. Тезкор тадбир давомида М.Ф. ушбу пулдан 3000 АҚШ долларини маҳаллий фуқародан олаётган вақтида қўлга олинган. 

Қайд этилишича, ҳозирда ушбу шахсга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.