Ўзбекистон ва Словения автомобилсозлик соҳасида ҳамкорлик қилиши кутилмоқда
Ўзбекистон автомобилсозлик, бутловчи қисмлар, металл буюмлар, гидравлик турбиналар, насослар, фармацевтика маҳсулотлари биргаликда ишлаб чиқаришда Словения билан шериклик муносабатларини ўрнатади. Бу ҳақда Инвестициялар, саноат ва савдо вазирлиги ахборот хизмати хабар берди.
Хабарга кўра, 8 февраль куни Тошкентда “Ўзбекистон – Словения” бизнес-форуми бўлиб ўтди. Унда тегишли вазирлик, идоралар, тармоқ бирлашмалари раҳбарлари ва икки мамлакат ишбилармон доираларининг 100 дан ортиқ вакиллари иштирок этди. Forumда Ўзбекистон делегациясига Ўзбекистон Республикаси Бош вазирининг ўринбосари Жамшид Ходжаев, Словения делегациясига эса Словения Республикаси Бош вазирининг ўринбосари — ташқи ишлар вазири Тани Фаён бошчилик қилди.
Қайд этилишича, ташқи савдодаги кўрсаткичларни ошириш учун томонлар икки мамлакат ишбилармон доиралари учун зарур қўшимча шарт-шароитларни яратиб бериш масалалари бўйича келишиб олди. Эришилган келишувлар бизнес-форум давомида имзоланган Ўзбекистон ва Словения ўртасида Иқтисодий ҳамкорлик тўғрисидаги битимда аксини топди.
Шунингдек, тақдимот ва ишбилармон доиралари вакиллари ўртасида кечган мулоқотларда автомобилсозлик, бутловчи қисмлар, металл буюмлар, гидравлик турбиналар, насослар, фармацевтика маҳсулотлари биргаликда ишлаб чиқаришда шериклик муносабатларини ўрнатиш истиқболлари кўриб чиқилган. Чорвачилик, боғдорчилик ва уруғчиликни ривожлантириш бўйича қўшма лойиҳаларни амалга ошириш учун агросаноат комплексини яратиш, шунингдек, Словениянинг Меrcator Group йирик савдо тармоғи филиалининг Ўзбекистонда фаолиятини ташкил этиш имкониятлари муҳокама қилинган.
Таъкидланишича, тадбир якунида иштирокчилар Ўзбекистон ва Словения ўртасидаги иқтисодий ҳамкорликни янада кенгайтириш, мустаҳкам ишбилармонлик алоқаларини ўрнатиш, қўшма лойиҳа ва ташаббусларни амалга оширишда тадбиркорларни ҳар томонлама қўллаб-қувватлашга тайёрлигини билдирди. Forum “B2B” ва “G2B” музокаралари сессияси билан давом этди, унда томонлар янги инвестициявий лойиҳаларни ишлаб чиқиш ҳамда мамлакатлар ўртасидаги амалий ҳамкорликни янги даражага чиқариш ва ривожлантиришга қаратилган мустаҳкам савдо алоқаларини ўрнатиш юзасидан фикр ва таклифлар алмашди.
