6 февраль куни дунё аҳлининг диққат - эътибори Туркияда содир бўлган кучли ер силкинишига қаратилди. Мамлакатнинг қатор шаҳарларини вайрон қилган зилзилада, охирги маълумотларга кўра, — 3 419 киши ҳалок бўлди, салкам 20 534 киши жароҳатланди.
7,4 магнитудали ер силкиниши таъсирида бир неча шаҳарларда 6 мингтага яқин бинолар бутунлай вайрон бўлди. Вайроналар остидан жами 8 000 нафардан ортиқ одам тириклайин олиб чиқилди. 338 минг киши ётоқхоналар, университетлар ва бошпаналарга жойлаштирилди.
Президент Ражаб Тоййиб Эрдўғон Туркияда табиий офат қурбонлари муносабати билан етти кунлик миллий мотам эълон қилди. Унинг айтишича, бу зилзила Туркия тарихидаги 1939 йилдаги зилзиладан кейинги энг катта офатдир.
Ҳукумат аҳолини такрорланадиган ер силкинишларидан огоҳлантириб, уйларига қайтмасликка чақирди.
Маълумотларга кўра, Туркияда содир бўлган биринчи зилзиладан кейин яна 145 та ер силкинишлари қайд этилган. Мамлакат ҳукумати бинолар остида қолиб кетган, жароҳатланганларни қутқариш бўйича тезкор бригадалар ташкил этиб, қутқарув хизматларини жалб қилган.
Кўплаб мамлакатлардан Туркия халқига чуқур ҳамдардлик билдирилиб, инсонпарварлик ёрдамлари юборилмоқда. Айни пайтгача зилзила ҳудудларига хориждан 3 294 нафар қутқарувчи етиб келган. 70 та давлат ёрдамга тайёрлигини маълум қилган, Шундан 14 тасининг вакиллари аллақачон офат зонасида. Туркиядан ва хориждан 1 600 нафардан ортиқ қутқарувчилар гуруҳи Ҳатай вилоятига боради.
Ўзбекистон президенти Шавкат Мирзиёев Ражаб Тоййиб Эрдўғон билан телефон орқали мулоқот қилиб, Туркиянинг жануби-шарқий вилоятларида рўй берган кучли зилзила оқибатида кўплаб инсонлар қурбон бўлгани ва катта талафотлар кўрилгани муносабати чуқур ҳамдардлик изҳор этди. Туркия халқига, вафот этганлар ва жабрланганларнинг оилалари ва яқинларига сабр тилади.
Фавқулодда вазиятлар вазирлиги Туркияга Ўзбекистондан 100 кишидан иборат қидирув-қутқарув отряди жўнатилаётганини маълум қилган. “Ўзбекистон президентининг топшириғига асосан, 7 февраль куни зилзиладан талофат кўрган Туркия республикасига инсонпарварлик ёрдами ва ФВВ қидирув-қутқарув бўлинмалари жўнатилади. Туркияда содир бўлган вайронкор зилзила оқибатларини бартараф этишга Ўзбекистон ФВВнинг махсус техника ва кинология хизмати жалб этилади”, — дейилади вазирлик ахборотида.
Туркиядаги зилзила ортидан яна 6 та давлатда ер қимирлашлари юз берди. Хусусан, Сурия, кейин Ливан, Иордания, Исроил, Грузия, Арманистон ва Афғонистонда зилзилалар қайд этилган. Сурияда содир бўлган кучли ер силкиниши оқибатида 764 киши ҳалок бўлган, 1 минг 448 киши жароҳатланган.
Ижтимоий тармоқларда жамоатчилик шу каби кучли зилзила Ўзбекистонга ҳам етиб келиши мумкинлигидан хавотир билдирди. ФВВ бу ҳақдаги фикрлар юзасидан эълон қилган расмий муносабатида, Ўзбекистонда яқин орада кучли зилзилалар содир бўлмаслигини маълум қилди.
Сўнгги хабарларга кўра, бугун, 7 февраль куни, Тошкент вақти билан 08:13 да ҳам Туркиянинг марказий қисмида 5,3 магнитудали янги зилзила содир бўлди. Зилзила эпитцентри Анқарадан 43 км, Бесни шаҳридан 13 км узоқликда жойлашган. Ҳозирча унинг тафсилотлари тўлиқ очиқланмаган.
Изоҳ (0)