Сурия шимоли-ғарбидаги кучли зилзиладан сўнг ИШИД террорчилик гуруҳига мансубликда гумон қилинган камида 20 нафар маҳбус қамоқдан қочиб кетди. Бу ҳақда Аl Arabia хабар берди.
“Қамоқдан 20 га яқин маҳбус қочиб кетди, улар ИШИД жангариларидир”, — дейди манба.
Туркия билан чегарадаги Ражу шаҳри яқинидаги қамоқхонада 2 000 га яқин одам жазони ўтамоқда, улардан 1 300 нафари террорчилар бўлиши мумкин. Ер силкиниши оқибатида бино вайрон бўлган, шундан сўнг маҳбуслар исён кўтарган. Улар қамоқхонанинг бир қисмини эгаллашга муваффақ бўлган. Сурия Инсон ҳуқуқлари мониторинги маркази маҳбусларнинг қочиб кетганини тасдиқлай олмаслигини айтмоқда, аммо қамоқда исён кўтарилганини тасдиқлади.
Туркияда сўнгги 80 йил ичида мамлакат учун энг катта вайронагарчиликка айланган зилзила 6 февралга ўтар кечаси содир бўлди. Зилзила эпимаркази Газиантеп шаҳридан 26 км узоқликда жойлашган. Зилзила ва ер силкинишлари Яқин Шарқ, Европа ва Марказий Осиёнинг бир қатор мамлакатларида сезилди.
Туркия президенти Ражаб Тоййиб Эрдўғон бу зилзилани 1939 йилдан бери мамлакат учун энг кучли табиий офат деб атади. Туркияда қурбонлар сони 3000 га яқинлашди, яна 15 834 киши жароҳатланди. Сурияда, сўнгги маълумотларга кўра, зилзила қурбонлари сони 700 дан ошди, 1400 дан ортиқ киши жароҳат олди.
Изоҳ (0)