Ўзбекистонда 2022 йилда қишлоқ хўжалик ҳайвонлари орасида ўта хавфли юқумли касалликлар кузатилмагани маълум бўлди

АОКАда ўтказилган брифингда Ветеринария ва чорвачиликни ривожлантириш қўмитаси бошқарма бошлиғи Алишер Сафаров 2022 йили соҳада амалга оширилган ишлар тўғрисида маълумот берди.

Қайд этилишича, 2022 йилда Ветеринария ва чорвачиликни ривожлантириш қўмитаси томонидан дунё бўйлаб ҳайвонлар орасида келиб чиқаётган касалликларнинг мамлакат ҳудудига кириб келиши ва тарқалишини олдини олиш мақсадида чорва молларининг:

• 35 миллион 400 минг боши куйдирги касаллигига;
• 19 миллион 800 минг боши оқсил касаллигига;
• 2 миллион 700 минг боши қорасон касаллигига;
• 6 миллион 800 минг боши нодуляр дерматит касаллигига;
• 8 миллион 300 минг боши ҳайвонлар чечаги касаллигига;
• 12 миллион 300 минг боши бруцеллёз касаллигига;
• 1 миллион 300 минг боши брадзот касаллигига;
• 114,0 минг боши лептоспироз касаллигига;
• 7 минг 400 бош туялар эса ўлат касаллигига;
• 28 минг 200 бош қуёнлар вирусли геморрагик иситма касаллигига;
• 10 миллион 700 минг бош паррандалар Ньюкасл касаллигига;
• 2 миллион 700 минг бош рўйхатга олинган ит ва мушуклар қутуриш касаллигига қарши профилактик эмланган.

Шунингдек, 35,5 миллион бош чорва моллари эктопаразитларга қарши профилактик ишлов берилиб, чорва моллари сақланадиган 1 миллион 200 та бино ва иншоотларда дезинфекция ва дезинсексия тадбирлари ўтказилган.

Ҳайвонларнинг ўта хавфли юқумли касалликларини аниқлаш мақсадида қўмита тасарруфидаги Республика ҳайвонлар касалликлари ташхиси ва озиқ-овқат маҳсулотлари хавфсизлиги давлат маркази лабораторияларида мунтазам диагностик текширувлар олиб борилган. Амалга оширилган профилактик тадбирлар ва кўрилган кескин чоралар натижасида ўтган давр мобайнида мамлакат қишлоқ хўжалик ҳайвонлари орасида ўта хавфли юқумли касалликлар кузатилмаган.